Հայ ըմբիշները ՖԻԼԱ-ի դասակարգման աղյուսակում առաջադիմել են

Արդեն հայտնել ենք Դորտմունդում հունահռոմեական ոճի ըմշամարտի հեղինակավոր մրցաշարում ՝ «Գերմանիայի Մեծ մրցանակի» խաղարկությունում, մեր ըմբիշների աննախադեպ փայլուն ելույթի մասին: Գերմանիայում մեր պատվիրակները 8 քաշային կարգերից 6-ում ոսկե ու 1 բրոնզե մեդալ նվաճեցին: Այս, ինչպես նաև սրանից առաջ իտալական Սասարի քաղաքում ունեցած ոչ պակաս հաջողված մրցելույթները մեծապես նպաստեցին, որպեսզի օրերս հրապարակված` ՖԻԼԱ-ի դասակարգման ցուցակում Հայաստանի ընտրանու անդամներն առաջադիմեն:

Նշված երկու մրցաշարերում իրենց գերազանց դրսևորած Արթուր Ալեքսանյանն ու Արսեն Ջուլֆալակյանը իրենց քաշային կարգերում` 98 կգ և 75 կգ, շարունակում են գրավել, համապատասխանաբար, 1 և 3-րդ տեղերը: Վերոհիշյալ 2 ստուգատեսներում հաղթող ճանաչվեց նաև 59 կգ քաշային կարգի ըմբիշ Ռոման Ամոյանը, ով այս անգամ դասակարգման ցուցակում առաջադիմել և 14-ից բարձրացել է 6-րդ հորիզոնական:

Դորտմունդում հիանալի գոտեմարտեր վարած ու անվիճելիորեն ստուգատեսի հաղթող դարձած ևս մի ըմբիշ՝ 85 կգ քաշային Արթուր Շահինյանը, ով այս մրցաշարում պարտության մատնեց Եվրոպայի գործող չեմպիոն, Ուկրաինայի պատվիրակ Ժան Բելենյուկին, 18-րդ հորիզոնականից բարձրացել է 7-րդ տեղ: Հետաքրքիր է, որ չնայած Շահինյանից կրած պարտությանը, Բելենյուկը սկսել է գլխավորել այս քաշային կարգի դասակարգման ցուցակը, քանի որ աշխարհի գործող չեմպիոն` իրանցի Թալեբ Նեմաթփուրը արգելված խթանիչներ օգտագործելու համար որակազրկվել է:

ՖԻԼԱ-ի պաշտոնական կայքում հրապարակված դասակարգման ցուցակում, ըստ քաշային կարգերի, 20 լավագույն ըմբիշների շարքերում տեղեր են գտել`

59 կգ՝ 1.Ալեքսանդր Կոստանդինով, (Բուլղարիա), 6.ՌՈՄԱՆ ԱՄՈՅԱՆ (ՀԱՅԱՍՏԱՆ), 7.Էդվարդ Բարսեղյան (Լեհաստան), 11.ԿԱՐԵՆ ԱՍԼԱՆՅԱՆ (ՀԱՅԱՍՏԱՆ) :

66 կգ՝ 1.Ադամ Կուրակ (Ռուսասստան), 9.ԱՐԱՄ ՋՈՒԼՖԱԼԱԿՅԱՆ (ՀԱՅԱՍՏԱՆ):

71 կգ՝ 1.Թամաշ Լորենց (Հունգարիա), 14.Արմեն Վարդանյան (Ուկրաինա), 15.ՎԱՐՇԱՄ ԲՈՐԱՆՅԱՆ (ՀԱՅԱՍՏԱՆ) :

75 կգ՝ 1.Հյեոն Վու Կիմ (Կորեա ), 2.Ալեքսանդր Չեխիրկին (Ռուսաստան) , 3.ԱՐՍԵՆ ՋՈՒԼՖԱԼԱԿՅԱՆ (ՀԱՅԱՍՏԱՆ), 4.Ռոման Վլասով (Ռուսաստան), 17.ԿԱՐԱՊԵՏ ՉԱԼՅԱՆ, (ՀԱՅԱՍՏԱՆ):

80 կգ՝ 1.Պետեր Բաքսի (Հունգարիա)

85կգ՝ 1.Ժան Բելենյուկ (Ուկրաինա) , 7.ԱՐԹՈՒՐ ՇԱՀԻՆՅԱՆ (ՀԱՅԱՍՏԱՆ), 8.ՄԱՔՍԻՄ ՄԱՆՈՒԿՅԱՆ (ՀԱՅԱՍՏԱՆ) :

98կգ ՝ 1.ԱՐԹՈՒՐ ԱԼԵՔՍԱՆՅԱՆ (ՀԱՅԱՍՏԱՆ):

130կգ՝ 1.Ռիզա Կայաալպ (Թուրքիա):

Աղբյուր`  Wrestling.am