«Վերնիսաժի» գործ. անհետացել է մեքենան, որում կրակոցներ են արձակվել

Վալերի Հովհաննիսյանը, ով վիրավորվել է մայիսի 17-ին «Վերնիսաժի» մոտ արձակված կրակոցներից, մեկ անգամ վիրահատվել է և պատրաստվում է երկրորդ վիրահատությանը, մինչ օրս նախաքննական մարմնի կողմից որպես տուժող չի ճանաչվել.

 «Քրեական դատավարության օրենսգրքի 54-րդ հոդվածը իմպերատիվ կերպով է սահմանում, որ եթե անձը, ում  քրեական օրենսգրքով չթույլատրված արարքով անմիջականորեն պատճառվել է բարոյական, ֆիզիկական, գույքային վնաս, պետք է ճանաչվի տուժող»,- լրագրողների հետ հանդիպմանն ասաց Վալերի Հովհաննիսյանի փաստաբան Լևոն Բաղդասարյանը:

Փաստաբանը գործի վերաբերյալ որոշ մանրմասներ հայտնեց և կարևոր մի հանգմանք ընդգծեց` մինչ օրս չի հայտնաբերվել այդ օրը Վալերիի վարած մեքենան, որի մեջ էլ երկու հրազենային կարկոց է արձակվել:

«Այն լուրերը, թե Վ. Հովհաննիսյանը հրազենային վնասվածքը ստացել է դրսում, կարծում եմ, մեղմ ասած, ճիշտ չեն: Առաջին հրազենյաին վնասվածքը նա ստացել է ղեկին նստած: Դրանից հետո նա բացում է դուռը և ցանկանում փախչել, և ստանում է երկրորդ հրազենային վնասվածքը. Մոտ 5 մետր փախչում է և վայր ընկնում` ուժասպառ»,- ասաց Լ. Բաղդասարյանը:

Փաստաբանի խոսքերով, նախաքննական մարմինն մինչ օրս անգործության է մատնված և չի փորձում գտնել մեքենան, որով, ի դեպ, հիվանդանոց են տեղափոխել վիրավորներից և ներկայումս արդեն կալանքի տակ գտնվող և մեղադրյալ Ներսես Մելքոնյանին, որից հետո մեքենան անհետացել է:

Այնինչ, Լ. Բաղդասարյանի խոսքերով, այդ մեքենան պատկանելիս է եղել Վալերիի հորը` Սամվել Հովհաննիսյանին, և  վերջինս էլ օրեր առաջ դիմել է ոստիկանություն` և հայտնել վերոնշյալ տեղեկությունները, պահանջելով հայատնաբերել իր մեքենան: Ի դեպ, փաստաբանի կարծիքով, այս գործով տուժող պետք է ճանաչվի նաև Վալերիի հայրը, ում մեքենան ներկայումս չկա:

Yerkir.am-ի այն հարցերին, թե արդյո՞ք մինչ կրակոցները ծեծկռտուք չի եղել, և թե արդյո՞ք փաստաբանը մտահոգություններ չունի, որ, ինչպես Ներսեսին, այնպես էլ իր պաշտպանյալին կարող են որպես մեղադրյալ ներգրավել գործին, փաստաբանը պատասխանեց.

«Ունենք մտահոգություններ, որ կարող են սուբյեկտիվ  գործառույթներ տեղի ունենալ, և դա է պատճառը, որ պարտադիր ենք համարում մեքենայի հայտանաբերումը: …Ինչ վերաբերում է  փողոցում եղած խոսակցություններին. Ապա ավելի քան վստահ եմ, որ հենց էնպես վիճաբանություններ չէին լինի: այո, եղել է վեճ, իսկ ով է ասել, որ դրա հետևանքը պետք է լինեն կրակոցներ»,- փաստաբանը հավելեց նաև, որ ոչ մի դեպքում չպետք է արդարացնել զենքի գործադրումը:

Փաստաբանն, ի դեպ, հայտնեց նաև, որ տեղյակ է` 29-ամյա Վալերին նախկինում դատապարտված է եղել, քրեական հեղինակություն է: