«Վերնիսաժի» գործ. փաստաբանի պնդմամբ՝ Վալերիին խոշտանգում են

Քիչ առաջ վերաքննիչ քրեական դատարանը մերժեց «Վերնիսաժի» գործով մեղադրյալներից Վալերի Հովհաննիսյանի խափանման միջոցի` կալանքի դեմ տարված բողոքը:

Yerkir.am-ի հետ զրույցում Վալերի Հովհաննիսյանի փաստաբան Լևոն Բաղդասարյանը հայտնեց, որ բողոքը քննվել է առանց իր պաշտպանյալի ներկայության, ինչն իրավունքի կոպիտ խախտում է:

Փաստաբանը հայտնեց, որ ներկայումս պատրաստվում է վճռաբեկ դատարանին բողոքարկել խափանման միջոցի վերաբերյալ դատական ակտը, և եթե դրական արդյունք չլինի, ապա կդիմի նաև Եվրոպական դատարան:

Փաստաբանի խոսքով՝ իր պաշտպանյալի հանդեպ անմարդկային վերաբերմունք է դրսևորվում, վիրավորում են նրա արժանապտվությունը, խոշտանգում:

Վալերի Հովհաննիսյանի մայրը` Լիա Հովհաննիսյանը, մեզ հետ զրույցում նույնպես դժգոհեց որդու հանդեպ անմարդկային վերաբերմունքի կապակցությամբ: Նրա խոսքով՝ իր որդուն ուղղակի «գողացել» են հիվանդանոցից: Իսկ ներկայումս էլ ճնշումներ են կիրառում որդու և իրենց վրա, սպառնում, պահանջում, որ Վալերին իրեն մեղավոր ճանաչի առաջադրված մեղադրանքի մասով, որպեսզի կրակոցներ արձակած Գոռ Առաքելյանի «պատիժը թեթևացնեն»` առաջ տանելով ինքնապաշտպանության վարկածը:

Մանրամասները` տեսանյութում: