Ըստ ՀՀԿ-ական պատգամավորի` ռուսների կրքերը բորբոքված են Ուկրաինայի պատճառով

ԱԺ ՀՀԿ խմբակցության պատգամավոր Կարինե Աճեմյանի կարծիքով` այն տարածաշրջանում, որտեղ գտնվում է Հայաստանը, քաղաքացիներն անպայման պետք է տիրապետեն ռուսերեն լեզվին: Այսօր լրագրողների հետ զրույցում Կարինե Աճեմյանը խոսեց երեկ ռուս լրագրող Կիսելյովի հետ հանդիպման մասին: Լրագրողները հետաքրքրվեցին, թե ինչո՞ւ ԱԺ պատգամավորները համարժեք չհակադարձեցին Կիսելյովին:

«Պատգամավորական ակումբն այն հարթակը չէ, որտեղ պետք է միմյանց հակադարձեինք: Տիկին Նաղդալյանը հակադարձեց, որ տաքսու վարորդի ռուսերեն չիմանալը ոչինչ չի նշանակում: Դա այդ հարթակը չէր, որտեղ, թուր-թվանքը առած, պետք է հակադարձեինք»,- ասաց պատգամավորը` համաձայնելով այն կարծիքին, որ հենց ռուս լրագրողներն էին օգտագործում այդ հարթակը` իրենց քարոզչությունը տարածելու համար:

Կարինե Աճեմյանի խոսքով` քաղաքական հետազոտությունների կենտրոնի տնօրեն Վերոնիկա Կրիշեննինիկովան հենց սկզբից խոսել է Հայաստանում գործող «Սորոս» հիմնադրամից, ամերիկյան հիմնադրամների գործունեությունից` ներկայացնելով դա բացասական ձևով:

Yerkir.am-ի հարցին` ինչո՞ւ ԱԺ պատգամավորները չհարցրեցին Կիսելյովին, թե որքան հայկական դպրոց է գործում Ռուսաստանում, ինչո՞ւ են ռուսները տիրապետողի դիրքերից խոսում, Կարինե Աճեմյանը պատասխանեց. «Որովհետև Ռուսաստանը շատ մեծ երկիր է, Հայաստանը շատ փոքր է: Ուկրաինայի պես պետությունն այսօր կախում ունի թե' Եվրոպայից, թե' Ռուսաստանից: Երբ մենք ունենք Ղարաբաղի խնդիր, սահմանային լարվածություն, ուրեմն մենք պետք է խուսափենք սուր անկյուններից»,:

Նա հավելեց, որ լրագրողները չափազանցնում են՝ ներկայացնելով Կիսելյովի արտահայտությունները:

Կարինե Աճեմյանի կարծիքով` ռուսների կրքերը բորբոքված են Ուկրաինայի դեպքերից հետո, և նրանք շատ ցավոտ են ընդունում բոլոր հարթակներում տարբեր դիրքորոշումներ:

Նա նաեւ չցանկացավ գնահատական տալ իր գործընկերոջ` Հայկ Բաբուխանյանի պահվածքին: