Վիրավորների վիճակը բավարար է. Սեյրան Օհանյան

Այսօր Սարդարապատի հուշահամալիր այցելած պաշտպանության նախարար Սեյրան Օհանյանը չհերքեց, որ վերջին շրջանում շփման գծում առկա է որոշակի լարվածություն:

Անդրադառնալով մայիսի 27-ի լույս 28-ի գիշերը հակառակորդի իրականացրած դիվերսիոն հարձակման փորձին` Օհանյանը հայտարարեց, որ խոսել է ԼՂՀ պաշտպանության նախարարի հետ, ով ևս փաստել է, որ հրադադարի ռեժիմը խախտել է ադրբեջանական կողմը։

«Ցավոք, մենք էլ ենք ունեցել մեկ զոհ և վիրավորներ։ Վիրավորների վիճակը բավարար է»,- ասաց նախարարը:

Ըստ Սեյրան Օհանյանի` հայկական կողմը համարժեք պատասխան է տվել։

«Փա՛ռք ու պատիվ բոլոր այն տղաներին, ովքեր այսօր էլ, այս դժվարին պայմաններում էլ իրենց երիտասարդ կյանքը զոհում են կամ պատրաստ են զոհելու հայրենիքի անվտանգությունն ապահովելու համար»,- նշեց նախարարը: