Երթուղայինի վթարից տուժած 4 վիրավորների վիճակը միջին ծանրության է

Երեւանում, այսօր՝ դեկտեմբերի 30-ին, ողբերգական դեպք է տեղի ունեցել. ժամը 15:10-ի սահմաններում թիվ 42 երթուղին սպասարկող ГАЗель մակնիշի 24 86 Տ համարանիշի ավտոմեքենան Վանցյան փողոցում, դեռեւս անհայտ հանգամանքներում, դուրս է եկել հանդիպակաց երթեւեկելի գոտի եւ բախվել թիվ 42/1 տան դիմաց տեղադրված փայտե էլեկտրասյանը:

Shamshyan.com-ի  հաղորդմամբ, վթարի հետեւանքով վարորդն ու 4 ուղեւորներ մարմնական վնասվածքներով տեղափոխվել են «Աստղիկ» բժշկական կենտրոն, որտեղ վիրավորներից մեկը գիտակցության չգալով՝ մահացել է:

Տուժածները ստացել են առաջին բուժօգնություն, այժմ անցնում են հետազոտություններ, բոլորի վիճակը գնահատվում է միջին ծանրության՝ հայտնում է Առողջապահության նախարարությունը:

Ոստիկանությունն ու քննչական բաժինը պարզում են վարորդի, մահացածի եւ վիրավորների ինքնությունը: Դեպքի վայրում հավաքվածներն ասել են, որ վիրավորներին առաջինը օգնութան են հասել քաղաքացիները եւ օպերատիվ են գործել Երեւանի 1-03 շտապօգնության բժիշկներն ու «Աստղիկ» բժշկական կենտրոնի բուժանձնակազմը:

Աղբյուրը  հայտնում է, որ նշված երթուղին սպասարկում է Հարավ-արեւմտյան թաղամասից մինչեւ «Գրանդ Սպորտ»: