Regnum-ի աղբյուրները հայտնել են Սերժ Սարգսյանի՝ Մինսկ չմեկնելու պատճառը

Մինսկում մեկնարկել է Եվրասիական տնտեսական բարձրագույն խորհրդի նիստը, որին մասնակցում են Ռուսաստանի, Բելառուսի և Ղազախստանի ղեկավարները:

Հայաստանը չի մասնակցում նիստին: Regnum-ի` իշխանությանը մոտ կանգնած աղբյուրների համաձայն՝ Հայաստանի նախագահ Սերժ Սարգսյանը չի մասնակցում ԼՂ հարցում Մաքսային միության երկրների, մասնավորապես` Ղազախստանի դիրքորոշման պատճառով:

Աղբյուրների խոսքերով՝ Ռուսաստանի, Բելառուսի ու Ղազախստանի միջև չհամաձայնեցված են մնում նաև մի շարք այլ հարցեր, որոնք առնչվում են ինտեգրացիոն միավորումների հետագա գործունեությանն ու զարգացմանը:

Գործակալությունը նաև հիշեցնում է,  որ դեռեւս 2013-ի  դեկտեմբերի 24-ին Նուրսուլթան Նազարբաևն ընդգծել էր, որ անհրաժեշտ է հստակեցնել Մաքսային միության սահմանները՝ կապված ԼՂ հիմնախնդրի հետ: Իսկ Ալեքսանդր Լուկաշենկոն հայտարարել էր, որ Հայաստանի՝ ՄՄ-ին միանալու հարցում պետք  է հաշվի առնել Ադրբեջանի կարծիքը: