Սերժ Սարգսյանն ասում է, թե ինչու չաշխատեց ԵՄ Արևելյան գործընկերությունը

Պրահայում ընթացող ԵՄ Արևելյան գործընկերության հոբելյանական բարձր մակարդակի հանդիպման երկրորդ օրը ևս Սերժ Սարգսյանը ելույթ է ունեցել:

Ի թիվս այլ հարցերի, ՀՀ նախագահը ներկաներին ուշադրությունը հրավիրել է Արևելյան գործընկերության որոշ բաղադրիչների, առհասարակ այս միավորման չաշխատելու վրա:

ՀՀ նախագահը նշել է, որ Արևելյան գործընկերությունը դեռևս իր ձևավորման փուլում որոշակի խնդիր ուներ: Մասնավորապես, հայտնի չէր, թե գործընկերներին ինչ սկզբունքով էին միավորել. երկրները տարբեր էին իրենց մոտեցումներով, իրենց ձգտումներով։ «Եվ կարծում եմ` սա է պատճառը, որ գոնե Արևելյան գործընկերության մի բաղադրիչը՝ տարածաշրջանային համագործակցության բաղադրիչը, այդպես էլ չաշխատեց: Ինձ համար մինչև հիմա հասկանալի չէ, թե ի՞նչ սկզբունքներով մենք և Ադրբեջանը միավորվեցինք մի գործընկերության մեջ. տարբեր հնարավորություններ, տարբեր մոտեցումներ, տարբեր ձգտումներ, և սա է պատճառը, որ այդ բաղադրիչը չաշխատեց: Ես վստահ եմ, որ բոլոր պարագաներում գործընկերությունը շարունակվելու է, վստահ եմ, որ լինելու են բարդություններ, ինչպես առկա են այսօր, բայց նաև վստահ եմ, որ բոլոր այդ բարդությունները լուծվելու են խաղաղ ճանապարհով»,– ասել է Սերժ Սարգսյանը: