Տիգրան Սարգսյանի առաջարկությունը` ցուցարարներին

ՀՀ վարչապետի պաշտոնակատար Տիգրան Սարգսյանը քիչ առաջ հանդիպեց Հանրապետության հրապարակում նստացույց անող` «Դեմ եմ պարտադիրին» նախաձեռնության անդամներին ու համախոհ քաղաքացիներին:

Նա նախ առաջարկեց, որ եթե ուզում են փոփոխություններ կատարվեն կուտակային կենսաթոշակների մասին օրենքներում, ապա աշխատանքային խումբ ձևավորեն և կաշխատեն այդ ուղղությամբ: Սակայն ցուցարարները բացականչեցին` «դեմ եմ»:

Նախաձեռնության անդամներից մեկը հստակ ներկայացրեց, որ իրենց պահանջը ՊԵԿ-ի կայքում էլեկտրոնային հաշվետվություններում փոփոխություններ կատարելն է, պարտադիր կուտակային վճարի ինքնաշխատ կերպով հաշվարկվող հատվածը հանելը:

Տ. Սարգսյանն ասաց, որ այդ դեպքում պետք է իրավասու մարմինները քննարկեն այդ հարցը, և «Դեմ եմ»-ի ներկայացուցիչներին բացառիկ հնարավորություն կտրվի մասնակցելու այդ քննարկումներին:

Վարչապետի պաշտոնակատարը նաեւ կոչ արեց ցուցարարներին` ազատել փակված փողոցները, քանի որ այդպիսով խախտում են այլ քաղաքացիների տեղաշարժման իրավունքը: Այնուհետև ևս մեկ անգամ երկխոսության գնալու կոչ արեց:

Ցուցարարներին, սակայն, վարչապետի առաջարկներն առանձնապես չգոհացրեցին: