Հայաստանում օրենքով գողերն ու ԱԴԾ-ն հեղաշրջում են ծրագրել Վրաստանում. Սահակաշվիլի

Վրաստանի նախկին նախագահ Միխեիլ Սահակաշվիլին հայտարարել է, որ 2007-ին  «Իմեդի» հեռուստաընկերության վրա հարձակումը «համալիր գործոններին» արձագանք էր. հայտնում է apsny.ge-ն: Սահակաշվիլին պատմել է՝ ով, որտեղ և ինչպես էր պետական հեղաշրջում նախապատրաստում Վրաստանում:

«ԱՊՀ երկրներից մեկի առաջնորդը, անունն այժմ չեմ ցանկանում տալ, նա դեռևս ղեկավարում է իր երկիրը, պատմել է ինձ, որ 2007-ի սեպտեմբերին իր մայրաքաղաքում Պուտինի հետ զրույցից հետո ժամանել են Պատարկացիշվիլին և ՌԴ Անվտանգության դաշնային ծառայության մի քանի գեներալներ:  Գեներալների հետ օեր տևած քննարկումներից հետո ծրագրվել է գործողությունը Վրաստանում: Հետո՝ նոյեմբերին, ԱՊՀ հանդիպումներից մեկի ժամանակ Պուտինն ասել է, որ Վրաստանի նախագահը Պատարկացիշվիլին է: Մինչ այդ Հետաքննությունների դաշնային բյուրոն (ՀԴԲ) մեզ նամակ է ուղարկել, որում ասվում էր,  որ օրենքով գողեր Մուսոյանը, Կալաշովը և ոմն երրորդը Հայաստանում են եղել և ԱԴԾ-ի հետ հեղաշրջում են ծրագրել Վրաստանում»,- ասել է Սահակաշվիլին «Ռուսթավի 2»-ին տված հարցազրույցում:

Նրա խոսքով` պետական հեղաշրջումը ծրագրվել է Վրաստանի՝ ՆԱՏՕ-ին անդամակցությանը զուգահեռ: «Դա պետական հեղաշրջման հաջողված փորձ էր, քանի որ ես հրաժարական եմ տվել»,- ասել է Սահակաշվիլին: