Թրաֆիքինգի ենթարկված աղջիկը հեռացել է ՀՀ-ից անհանդուրժողականության պատճառով

Շուրջ 1,5 տարի է` շարունակվում է 16-ամյա աղջկան թրաֆիքինգի ենթարկելու վերաբերյալ դատական գործի քննությունը: Այսօր հերթական դատական նիստը հետաձգվեց մեղադրյալի փաստաբան, հանրային պաշտպան Մարինե Թովմասյանի գերզբաղվածության պատճառով:

Դատարան չէին ներկայացել նաև տուժողի ներկայացուցիչն ու դատախազը. նախապես տեղեկացել էին նիստի հետաձգվելու մասին:

Ի դեպ, Yerkir.am-ի հետ զրույցում տուժողի պաշտպան Օլգա Սաֆարյանը հայտնեց, որ այժմ արդեն չափահաս Արևիկը դատական նիստերին չի մասնակցում և հանրապետությունից դուրս է եկել հասարակության անհանդուրժող վերաբերմունքի պատճառով: Բանն այն է, որ մեղադրյալի հարազատները պարբերաբար սպառնացել ու անվանարկող լուրեր են տարածել աղջկա անցյալի և վարքի մասին:  

Հիշեցնենք, որ մեղադրյալ Ռ.Մ-ն, համաձայն մեղադրականի, 2011թվականի հուլիսին իր հանցակցի հետ անչափահաս` 16-ամյա Արմինեին ՀՀ Բագրատաշենի սահմանային կետով շահագործման նպատակով տեղափոխել էին ՌԴ Մինվոդի քաղաք: Այնտեղ աղջկա փախուստը կանխելու նպատակով վերցրել էին նրա անձնագիրը, ապա, բռնություն գործադրելով, փորձել էին ներգրավել պոռնկության մեջ՝ ստիպելով զբաղվել մարմնավաճառությամբ և աշխատած գումարները փոխանցել իրենց: Սակայն տեսնելով, որ աղջիկը դիմադրում է,  պարտադրել էին Մինվոդի քաղաքին հարակից Նագուտսայա գյուղում գբաղվել հողագործությամբ:

Ա.Կ.

Հ.Գ. Հերոսների անունները փոխված են, քանի որ ամբաստանյալի դեպքում դեռեւս չկա ուժի մեջ մտած դատավճիռ, 

իսկ տուժողի դեպքում` հասկանալի է: