Հալեպում հայ աշակերտ է վիրավորվել

Հալեպի հայաշատ թաղամասերը մարտի 20-ին հրասանդների թիրախ են դարձել: Նոր Գյուղ թաղամասում ընկած հրթիռների պայթյունից հայ երեխա է վիրավորվել: Ըստ  Armenpress-ի՝ վիրավորը 9-րդ դասարանի աշակերտ Խաչիկ Գաբրիելյանն է: Երեխայի վիճակը կայուն է, նրա կյանքին վտանգ չի սպառնում:

Հալեպի Նոր Գյուղ թաղամասում հրթիռներ են ընկել Քարեն Յեփփե ազգային ճեմարանի գլխավոր փողոցում՝ մեկը` ՔԵԱ ճեմարանի բակում, մյուս երկուսը՝ ազգային Սահակյան վարժարանի վրա, իսկ չորրորդն ընկել է ազգային Սահակյան վարժարանի դիմաց: Հինգերորդը, որ չի պայթել, ընկել է Ս. Գրիգոր Լուսավորիչ եկեղեցու դիմացի պարտեզում: Բացի այդ` մեկ այլ հրթիռ ընկել է Սուլեյմանիե թաղամասի գլխավոր փողոցում՝ Ս. Վրացյան կենտրոնի մերձակա թաղամասում: Նյութական վնասներ են պատճառվել բնակիչների բնակարաններին և մեքենաներին:

ՄԱԿ-ի տվյալներով` Սիրիայում եռամյա հակամարտության ընթացքում զոհերի թիվը գերազանցել է 130 հազարը, այդ թվում` զոհված հայերի թիվը գերազանցել է 70-ը: Բացի այդ` 9 միլիոն սիրիացիներ, ստեղծված իրավիճակից ելնելով, ստիպված հեռացել են իրենց բնակավայրերից, որոնցից մոտ 5 միլիոնը բնակություն է հաստատել հարևան երկրներում: