Հայ ազգը չի նայի ռեկլամին, օղի լինի՝ կխմի, չլինի՝ չի խմի. ՀՀԿ-ական պատգամավոր

ԱԺ ՀՀԿ խմբակցության պագամավոր Համլետ Հարությունյանը նախընտրում է միմիայն արցախյան տնական թթի օղի: Նա նույնպես կողմ է քվեարկել հեռուստատեսությամբ թունդ ալկոհոլային խմիչքների գովազդը թույլատրող օրինագծին:

Պատգամավորի համոզմամբ՝ գովազդից չէ, որ հայ ազգը կարող է շատ կամ քիչ խմող դառնալ, այլ կերպ ասած՝ թունդ ալկոհոլային խմիչքների գովազդը չի կարող բացասական ազդեցություն ունենալ հասարակության վրա:

«Հայերի համար ի՞նչ վնասակար ազդեցություն` օղի լինի՝ կխմեն, չլինի՝ չեն խմի: Խմողի համար՝ ուզում եք ռեկլամեք, ուզում եք մի ռեկլամեք: Իսկ ինչ վերաբերում է նորմալ հայկական ընտանիքին, չկա մի ընտանիք, որ սեղանի շուրջ նստելիս, ճաշելիս, օղի չդնեն ու մի փոքր օղի չխմեն»,- ասաց Համլետ Հարությունյանը:

Նրա կարծիքով՝ ծխախոտի դեմ էլ են շատ գովազդներ լինում, ակցիաներ իրականացվում, սակայն դա չի ազդում, և ծխող մարդը շարունակում է ծխել` անկախ գովազդից:

«Չեմ կարծում, որ ռեկլամը ազդեցություն ունենա: Մենակ կնանիք են, որ խաբվում են արդուզարդերի ռեկլամին»,- ասաց Համլետ Հարությունյանը: