Մեր հայրենակցի նոր նվերը` Պետերբուրգի բնակչությանը

Մեծ Հայրենականի մասին հիշողությունը՝ որպես դրանում հաղթանակած ժողովուրդներին միավորող ուժ: Այս գաղափարի ներքո փետրվարի 20-ին ՌԴ Լենինգրադի մարզի Սինյավինո ավանում բացվեց Խորհրդային Միության առաջին կրկնակի հերոս, ավիացիայի գեներալ-լեյտենանտ Գրիգորի Կրավչենկոյի հուշարձանը: Դրա կանգնեցմանն օժանդակելու առաջարկով պետերբուրգաբնակ բարերար եւ հասարակական գործիչ Հրաչյա Պողոսյանին են դիմել «Շրջափակված Լենինգրադի բնակիչներ» եւ «ՌԴ ու ԽՄ հերոսների խորհուրդ»  կազմակերպությունները՝ հաշվի առնելով նրա զգալի ներդրումը Մեծ Հայրենականում զոհվածների հիշատակի հավերժացման գործում:

«Կրավչենկոն ծնվել է Ուկրաինայում, մեծացել Ղազախստանում ու զոհվել Ռուսաստանում, եւ ի դեմս այս հերոսի` ցանկանում էի միավորել մեր երկրները, որպեսզի վերադարձնենք նրանց միջեւ եղած սերն ու փոխըմբռնումը»,- ասում է ԱՊՀ ՄԽՎ գլխավոր քարտուղարի տեղակալի խորհրդական եւ բարերար Հրաչյա Պողոսյանը:

ԱՊՀ Միջխորհրդարանական վեհաժողովում ՌԴ Դաշնային խորհրդի ներկայացուցիչ Պյոտր Ռյաբուխինը խոստովանեց, որ երազում է հուշարձանի կողքին տեսնել ԱՊՀ բոլոր պետությունների դրոշները: «20 տարուց ավելի է` աշխատում եմ Միջխորհրդարանական վեհաժողովում եւ գիտեմ, որ մասնակից պետությունների եւ նրանց քաղաքացիների համար չկա ավելի ուժեղ միավորող գործոն, քան Մեծ Հայրենականի եւ դրանում տարած հաղթանակի մասին հիշողությունը»,- վստահ է նա:

Հուշարձանի օծման կարգը կատարվեց  Տիխվինի եպիսկոպոս Մստիսլավի հանդիսապետությամբ: Միջոցառմանը ներկա էին ԱՊՀ ՄԽՎ պատվիրակությունը, Արեւմտյան ռազմական օկրուգի հրամանատարի օգնականը, վետերաններ, հերոսներ, բարձրաստիճան զինվորականներ, հյուրեր Ուկրաինայից եւ Ղազախստանից, հերոսի զարմուհին՝ Օլգա Կրավչենկոն: «Մեր ընտանիքի համար այս հուշարձանի բացումը շատ մեծ տոն է: Անչափ շնորհակալ ենք բոլոր նախաձեռնողներին», - ասաց նա:  

 Գ. Մ.