Աշոտ Սուքիասյանի ոչ մի ցանկություն հաշվի չի առնվում. գլխավոր դատախազ

Վրաստանում ձերբակալված Աշոտ Սուքիասյանին Հայաստանին արտահանձնելու գործընթացները շարունակվում են, եւ արտահանձնումը դեռ տեղի չի ունեցել միայն ժամկետների առումով. լրագրողներին այսօր հայտնեց ՀՀ գլխավոր դատախազ Գեւորգ Կոստանյանը:

Արտահանձնման ժամկետները, ըստ նրա, յուրաքանչյուր երկրի համար սահմանվում են մարդու իրավունքների միջազգային կոնվենցիայով եւ տվյալ պետության օրենսդրությամբ:

«ՀՀ օրենսդրությամբ սահմանված են 40 եւ 90 օր ժամկետներ: Վրաստանի օրենսդրությամբ եւս սահմանված են նմանատիպ ժամկետներ` որոշ վերապահումներով: Այդ ժամկետների շրջանակներում որոշումները կկայացվեն»,- նշեց Գեւորգ Կոստանյանը:

Լրագրողների հարցին էլ, թե Աշոտ Սուքիասյանը չի՞ ցանկանում, որ իրեն արտահանձնեն Հայաստանին, արդյո՞ք նրա ցանկությունը հաշվի կառնվի, Գեւորգ Կոստանյանը պատասխանեց, թե ոչ մի ցանկություն հաշվի չի առնվում: