Էրդողանն անպատվել է իր ձայնագրությունը համացանցում տարածողներին

Երեկ համացանցում հայտնվելուց հետո մեծ աղմուկ էր բարձրացրել Թուրքիայի վարչապետ Էրդողանի և նրա որդու` Բիլալի` դեկտեմբերի 17-ին տեղի ունեցած հեռախոսազրույցի ձայնագրությունը, որում Էրդողանը հրամայում է որդուն թաքցնել տանը պահված 1 միլիարդ դոլարը:

Ըստ Haberler-ի` Էրդողանն իր կուսակցության ժողովի ընթացքում ելույթ է ունեցել և հերքել ձայնագրության մասին լուրերը: Անպատվելով բոլոր նրանց, ովքեր կազմակերպել են այդ «ծուղակը», այդ թվում` ընդդիմադիր Ժողովրդա-հանրապետական կուսակցության անդամներին, Էրդողանն ասել է, որ որոշ մարդիկ առանց ամաչելու ձայնագրում են իր ձայնը, ապա մոնտաժում` մատուցելով ժողովրդին: Ըստ վարչապետի` իր դեմ նման պահվածք ցուցաբերողների դեմքը պետք է ամոթից կարմրի: