Հայաստանում չկա որևէ պաշտոնյա, ով կարող է մտածել, որ ինքը ժառանգաբար է ստացել իր պաշտոնը. Նաիրա Զոհրաբյան

«Սերժ Սարգսյանի  ելույթում  որոշակի վտանգավոր միտումներ եմ տեսնում, այն է՝ բաժանարար գիծ սահմանել «մենք»-ի և «ձեր»-ի միջև: Այսինքն` մենք՝ իշխանությունները, և դուք՝ արտախոհրդարանական, խորհրդարանական քաղաքական ուժերը, հեռուստաընկերությունները,  տպագիր մամուլը»,- լրագրողների հետ զրույցում այսպես բնութագրեց ԱԺ ԲՀԿ խմբակցության քարտուղար Նաիրա Զոհրաբյանը  երեկ քաղաքաշինության նախարարությունում Սերժ Սարգսյանի արած այն հայտարարությունը, թե  4 խմբակցությունները քննադատում են իշխանություններին ու սևացնում իրականությունը։

«Ասվեց, որ 4 խորհրդարանական խմբակցությունները առավոտից  իրիկուն սևացնում են առկա իրականությունը, բայց  «Բարգավաճ Հայաստանը» խոսում է փաստերով, «Բարգավաճ Հայաստանը» ներկայացնում է այն, ինչ իրականում կա: Ցավում եմ, որ իրականությունն այնպիսին է, որ պոզիտիվ ածականներով այն բնորոշել, բնութագրել հնարավոր չէ: Դրա համար ենք ասում՝ միացյալ, համախմբված ուժերով փոխենք այդ իրականությունը»,- ասաց Նաիրա Զոհրաբյանը:

Հարցին, թե ինչո՞ւ ԲՀԿ-ն չի պահանջում Սերժ Սարգսյանի հրաժարականը, այլ միայն կառավարության հրաժարականը, Նաիրա Զոհրաբյանը նշեց, որ որևէ հարց չկա, որ չքննարկվի, քանի որ, առհասարակ, տաբու հարցեր չկան: «Չկա մի այնպիսի հարց, որը տաբու լինի, այդ թվում` և ձեր տված հարցը: Հայաստանում չկա որևէ պաշտոնյա, ով կարող է մտածել, որ ինքը ժառանգաբար է ստացել այդ պաշտոնը և ժառանգաբար այն կցված է իրեն»,- նշեց նա:

Պատգամավորը նշեց, որ ԲՀԿ-ն ունի  հստակ մշակված քայլերի հաջորդականություն, և վստահորեն գիտեն, թե որ քայլին որ քայլն է հաջորդելու: Հարցին՝ արդյո՞ք ունեն վարչապետի սեփական թեկնածու, Ն. Զոհրաբյանն ասաց, որ հավելյալ ոչինչ չի կարող ասել:

Ի պատասխան հարցին, թե կառավարության առաջարկած ո՞ր երեք հարցերը ԲՀԿ-ն կմերժեր կամ չեղյալ կհամարեր, Ն. Զոհրաբյանն առաջինը մատնանշեց. «Խայտառակ կուտակային համակարգի բարեփոխումները, որը   սոցիալական լրջագույն վիճակի է հասցնելու մոտ 260 հազար ՀՀ քաղաքացու: Պետք է վերանայել այն բոլոր առաջարկները, որոնք կոտրել են Հայաստանի տնտեսության ողնաշարը, բոլոր առաջարկները, որոնք կոտրել են փոքր և միջին բիզնեսը` իրենց հարկային պրեսինգով»: