Տիգրան Սարգսյանն իրականությունից կտրված է. վանաձորցին` վարչապետի մասին

Վանաձորի բնակիչ տիկին Մելսիդա Դեմիրճյանը շաբաթ օրը միացել էր «Դեմ ենք պարտադիրին» նախաձեռնության կազմակերպած վանաձորյան ակցիային: «Եկել եմ երիտասարդությանն աջակցելու, իրենց կողքին կանգնելու: Մենք դեմ ենք պարտադիրին` մեր մատաղ սերնդի համար»,- Yerkir.am-ի հետ զրույցում ասաց նա:

Տիկին Մելսիդային բազմաթիվ հարցեր են հուզում` օրենքի ապագայի հետ կապված` տարիներ հետո ո՞վ է երկիրը կառավարելու, ի՞նչ պետք է լինի այս երկրի հետ, որ 45 տարի հետո մարդիկ իրենց գումարները ստանան:

«Բոլորը դեմ են այս օրենքին»,- ասաց նա՝ հավելելով. «Բոլորն էլ դեմ են ՝ նկատի ունենալով իրենց երեխաների, թոռների ապագան, բայց ինչո՞ւ բոլոր դեմ մարդիկ դուրս չեն եկել` մասնակցելու բողոքի ակցիային, չգիտեմ, գուցե վախի մթնոլորտ կա»:

Հարցին՝ արդյո՞ք վանաձորցիների բողոքի ձայնը կհասնի ՀՀ վարչապետ Տիգրան Սարգսյանին, ով ծնունդով Վանաձորից է, տիկին Մելսիդան պատասխանեց. «Չեմ կարծում, որ նա հասկանում է վանաձորցիներին, նա իրականությունից կտրված է: Իշխանություններն առհասարակ կտրված են ժողովրդից: Ես չեմ համարում, որ նրանք ժողովրդի կողքին են: Մենք նրանց հետ հույսեր չենք կապում»: