Ադրբեջանցիների ակտիվությունը կապված է ''սև հունվար''-ի հետ. Սեյրան Օհանյան

Ամեն ինչ արվում է` հայ ռազմագերուն վերադարձնելու ուղղությամբ, թեև հետադարձ կապի բացակայությունը խոչընդոտում է դրան: Այսօր լրագրողներին հայտնեց ՀՀ պաշտպանության նախարար Սեյրան Օհանյանը` պատասխանելով հարցին` հնարավո՞ր է, որ հայ-ադրբեջանական սահմանին լարվածության մեծացումը բացասաբար անդրադառնա Ադրբեջանում հայ ռազմագերի Հակոբ Ինջիղուլյանի ճակատագրի վրա:

Սեյրան Օհանյանը նշեց, որ հայ ռազմագերու ազատ արձակման ուղղությամբ մեծ աշխատանք ունեն անելու միջազգային կառույցները, իսկ Ադրբեջանի իշխանությունները պետք է հասկանան, որ սադրանքներն ու լարվածությունը հանգեցնելու են բանակցային գործընթացի խափանմանը:

Խոսելով վերջին օրերին Ադրբեջանի կողմից սահմանին իրականացված դիվերսիոն գործողությունների մասին` նախարարը կարծիք հայտնեց, որ սովորաբար լարվածությունը շփման գծում տեղի է ունենում Ադրբեջանում որևէ քաղաքական գործընթացից առաջ կամ հետո: «Այն կապված է, կարծում եմ, ադրբեջանցիների կողմից առաջ քաշած «սև հունվար» գաղափարի հետ: Ադրբեջանում չեն հասկանում, որ հունվար ամսին, դրանից առաջ և հետո` տարբեր ժամանակներում, նրանք սև օրեր են իրականացրել Բաքվում ու Սումգայիթում»,- ասաց նախարարը:

Նրա խոսքով` թեև հունվար ամսին ադրբեջանցիները փորձում են սադրանքներ իրականացնել, սակայն, կրելով կորուստներ, նաև մտավախություն ունենալով, որ հայկական զինված ուժերը կարող են պատժիչ գործողություններ իրականացնել, սկսում են անկանոն ու խուճապային գործողությունների դիմել: