Հակառակորդը շուրջ 7 ժամ կրակել է Այգեպարի ուղղությամբ

Արդեն հայտնել ենք, որ երեկ ողջ գիշեր հակառակորդը գնդակոծության է ենթարկել Տավուշի մարզի սահմանամերձ բնակավայրերը: Երեկոյան ժամը 21-ից հակառակորդի թիրախում հայտնված Այգեպար գյուղի ղեկավար Անդրանիկ Այդինյանը yerkir.am-ին հայտնեց, որ հակառակորդը կրակը դադարեցրել է ժամը 4-ի սահմաններում: Գյուղի կրած կորուստների մասին գյուղապետն առայժմ դժվարացավ մեկնաբանություն տալ:

«Հիմա գնում եմ գյուղացիների հետ հանդիպման, գնամ իմ աչքով տեսնեմ, նոր կասեմ»,- ասաց նա:

Ավելի վաղ հայտնել էինք, որ երեկ երեկոյան Այգեպար գյուղում թշնամու գնդակից վիրավորվել էր 16-ամյա Լիանա Անիկյանը, ով Բերդի հիվանդանոցում վիրահատության է ենթարկվել: Yerkir.am-ի տեղեկություններով`  աղջկա վիրահատությունը հաջող է անցել: