Հակառակորդը կրակել է կոմբայնավարի ուղղությամբ. Մովսեսի գյուղապետը դիմել է Կարմիր խաչին

Հուլիսի 20-ի կեսօրին հակառակորդը մոտ կես ժամ կրակել է Տավուշի մարզի Մովսես գյուղի ցանքատարածությունների ուղղությամբ, որտեղ աշխատելիս են եղել գյուղացիները և կոմբայնավարը: Այս մասին Yerkir.am-ի հետ զրույցում ասաց Մովսեսի գյուղապետ Արարատ Ավալյանը:

«Բարեբախտաբար, ո՛չ մեխանիզատորները, ո՛չ կոմբայնը չեն տուժել: Կոմբայնավարը արագորեն թողել է տեղանքը, պատսպարվել, որից հետո մի կես ժամ անընդմեջ կրակել են այդ տարածքի վրա: Երբ մութն ընկել է, կոմբայնը հեռացրել ենք այդ վտանգավոր տարածքից, որը կազմում է 35 հեկտար, տեղափոխել այլ տարածք, որտեղ ներկա պահին կոմբայնը հունձ է կատարում»,- ասաց գյուղապետը:

Նա նշեց, որ դիմել է Կարմիր խաչի  կազմակերպությանը, որպեսզի նրանց ներկայացուցիչները գան, տեսնեն իրավիճակը: Առայժմ Կարմիր խաչից պատասխան չկա, դեռ սպասում են: Մովսեսի գյուղապետի խոսքով` նախադեպ չի եղել, որ դիմեն Կարմիր խաչին այդ հարցով, առաջին անգամ է, որ դիմում են: Ընդ որում՝ Կարմիր խաչը պետք է դիմի նաև հակառակ կողմին, և այդ առումով, Կարմիր խաչից արձագանքը կարող է ձգձգվել: