Ստեղծագործությունն իրավունք չունի անկեղծ չլինելու. Լիլիթ Բլեյան

Լիլիթ Բլեյանի ձայնասկավառակի /«Paciencia»՝ «Համբերություն»/ երկրորդ` հանրային շնորհանդեսն էր: Մութ ու ցուրտ էր, բախտներս բերեց` հոսանք չկար. Լիլիթ Բլեյանը նախ թեյով տաքացրեց ներկաներին, հետո կենդանի կատարումներով լուսավորեց տրամադրություններս:

Yerkir.am-ի հետ զրույցում Բլեյանը նշեց, որ ձայնասկավառակում տեղ գտած բոլոր երգերը, բացի «Ծննդյան գիշեր»-ից, գրվել են վերջին 1,5 տարվա ընթացքում: Ըստ նրա` ստեղծագործելիս չի մտածում, թե ինչ հետագա ճակատագիր է ունենալու գործը:

«Երբ երգը գալիս է, ես ուղղակի սկսում եմ գրել այն, իսկ հետո սկսում եմ մտածել` այն ինձ դո՞ւր է գալիս, թե՞ ոչ: Երգը պետք է անկեղծ ու ամբողջական լինի, իսկ թե միջավայրի հետ ինչ հարաբերություն կունենա, ես այդ մասին չեմ մտածում: Իմ կարծիքով` ստեղծագործությունն իրավունք չունի անկեղծ չլինելու, այդ դեպքում` ինչո՞ւ է այն կյանքի կոչվում»,- ասաց Բլեյանը:

Նրա հավաստմամբ` երգը պետք է տրամադրություն ստեղծի, եթե երգն իր ամենաառաջին նոտայից չի փոխում ունկնդրի տրամադրությունը, ուրեմն այն այնքան էլ անկեղծ չէ:

«Թող ստեղծագործությունը փափուկ, անբացատրելի լինի, բայց անպայման իր տրամադրությունը փոխանցի ունկնդրին»,- ասաց Բլեյանը: