Հայաստանին էլ ձեռնտու չէ, որ Ռուսաստանը հեռանա մեր տարածաշրջանից. քաղաքագետ

Երբեք գաղտնիք չի եղել, որ 1803 թվականից Ռուսաստանը համաձայն չէ եւ չի ուզել հեռանալ Հարավային Կովկասից: Եվ այն, որ չի ուզում հեռանալ, ամենեւին չի նշանակում, թե ուզում է մեզ տիրել. Yerkir.am-ին իր տեսակետը ներկայացրեց քաղաքագետ Լեւոն Մելիք-Շահնազարյանը' անդրադառնալով այսօր Գյումրիում Վլադիմիր Պուտինի «կատակ»-արտահայտությանը, թե Ռուսաստանը չի պատրաստվում հեռանալ Կովկասից:

Չհեռանալը, ըստ քաղաքագետի, կարող ենք տարբեր ձեւերով հասկանալ: «Ես դա հասկանում եմ աշխարհաքաղաքական իմաստով: Այդ իմաստով Հայաստանին էլ ձեռնտու չէ, որ Ռուսաստանը հեռանա մեր տարածաշրջանից: Համենայն դեպս, պետք է հիշել 1993 թվականը, երբ թուրքական զորքերը մոտեցել էին մեր սահմանին, եւ միայն Ռուսաստանի հայտարարությունն ու ՌԴ պաշտպանության նախարարի դիրքորոշումը կասեցրեցին Թուրքիայի հնարավոր հարձակումը Հայաստանի վրա: Այսօր էլ Ռուսաստանն ինչ-որ չափով, ես կասեի` մեծապես, մեր տարածաշրջանում խաղաղության երաշխավոր է»,- ասաց Լեւոն Մելիք-Շահնազարյանը:

Թե ո՞ւմ էր ուղղված Պուտինի «կատակը», քաղաքագետը նշեց, որ թուրքական լրատվամիջոցներն արդեն անդրադարձել են Պուտինի' Գյումրի գալուն եւ նմանատիպ հայտարարություններին  ու նշել, որ դրանք ավելի շատ ուղղված են Թուրքիային եւ Ադրբեջանին: Ըստ քաղաքագետի` ընդունված երեւույթ է, երբ պետությունների առաջին դեմքերը, օգտվում են այն հանգամանքից, թե որ տարածքում են խոսում ու այդ տարածքի հարեւան պետություններին կամ իշխանություններին ինչ-ինչ ազդանշաններ են ուղարկում:

«Պուտինը չէր կարող ոչինչ չասել, ոչ մի ազդանշան չուղղել այն երկրներին ու երկրների ղեկավարություններին, որոնք Ռուսաստանի հետ, համենայն դեպս, գաղափարախոսական հակառակորդներն են: Այսինքն` առաջին հերթին ուղղված էր նրանց: Բայց, մյուս կողմից, ուղղված էր նաեւ մեզ: Հարցն այն է, թե ինչ իմաստով ենք մենք ուզում հասկանալ այդ հայտարարությունը` փոխգործակցության ու դաշնակիցներ լինելու կոնտեքստո՞ւմ, թե՞ Հայաստանի դեմ, որը տվյալ դեպքում ես կհամարեի սխալ»,- իր տեսակետները ներկայացրեց Լեւոն Մելիք-Շահնազարյանը:

Քաղաքագետը պարզաբանեց, որ Հայաստանում կան մի խումբ մարդիկ, ովքեր, անտեսելով աշխարհագրական  սահմանները եւ այլն, անհիմն ձգտումներ են արտահայտում դեպի Եվրոպա, ԵՄ եւ այլն, այդ մարդիկ այսօր համարում են, որ Ռուսաստան-Հայաստան հարաբերությունները, ՄՄ-ին Հայաստանի անդամակցությունն ինչ-որ չափով պակասեցնում են Հայաստանի սուվերենությունն ու մեր երկրում ամրապնդում են Ռուսաստանի իշխանությունը: Այդպես մտածող մարդիկ, քաղաքագետի համոզմամբ, Պուտինի այս արտահայտությունը փորձում են մեկնաբանել հենց այդ իմաստով:

«Ես  ամենեւին համաձայն չեմ նման մոտեցմանը եւ նման մեկնաբանություններին ու համարում եմ, որ դրանք հորինված մտահոգություններ են, որոնք իրականության մեջ տեղ չունեն»,- նշեց քաղաքագետը: