Արտաքին ներդրումների համար պետք է պայքարել. ՀԲ ներկայացուցիչ

Հայաստանը Համաշխարհային բանկի համար միջին եկամուտներ ունեցող երկիր է: Այլ կերպ ասած` ո'չ աշխարհի ամենաաղքատ երկրների շարքն է դասվում, ո'չ էլ` ամենահարուստ:

Այսօր ՀԲ Հարավային Կովկասի տարածաշրջանային տնօրեն Հենրի Քերալին լրագրողներին բացատրեց, որ դա նշանակում է, որ որոշակի խնդիրներ կան, որոնց ուղղությամբ Հայաստանը դեռ պետք է հաջողություններ գրանցի` ինստիտուցիոնալ կայացման, կրթության, առողջապահության եւ այլն ոլորտներում: Իսկ եվրաբոնդերը նշանակում են, որ երկիրը հասել է մի այնպիսի մակարդակի, որ կապիտալի շուկաները կարողանում են վստահել երկրին:

«Փաստորեն, կապիտալի շուկա մուտքը Հայաստանի համար մեծ նշանակություն ունի, քանի որ աղքատ երկրները չեն կարող կապիտալի շուկա մուտք գործել: Բայց, այդուհանդերձ, հարուստ երկրները ավելի մեծ հասանելիություն ունեն կապիտալի շուկաներին, քան Հայաստանն է կարողացել ապահովել»,- նշեց Քերալին:

Ինչ վերաբերում է ՀԲ այն հրապարակմանը, թե Հայաստանի տնտեսությունը վերականգնվել է ճգնաժամից հետո, ՀԲ հայաստանյան գրասենյակի ղեկավար Ժան Միշել Հափին նշեց, թե ՀԲ-ն այդպիսի ուսումնասիրության համար հաշվի է առնում մեկ շնչին բաժին ընկնող ՀՆԱ ցուցանիշը, որը 2013 թվականին Հայաստանում կազմել է 3700 դոլար` նախկին 3400-ի փոխարեն:

«Բայց ճգնաժամի ընդհանուր հաղթահարումը չի արտացոլվել աղքատության մակարդակի կրճատմամբ: Հիմա Հայաստանում բնակչության ամեն երեք հոգուց մեկը գտնվում է աղքատության գծից ներքեւ: Մեր հիմնական արձագանքը այս իրավիճակին, զարգացման հիմնական շեշտադրումը եւ աշխատանքները ուղղված են լինելու աշխատատեղերի ստեղծմանը, որոնք աղքատներին կհանեն աղքատության ճիրաններից»,- պարզաբանեց Հափին:

Սա, ըստ նրա, կանդրադառնա նաեւ արտագաղթի տեմպերի նվազման վրա, քանի որ երբ տնտեսության աճ ապահովվի, հատկապես` առեւտրային ոլորտում, երիտասարդները կզգան, որ Հայաստանում աճ կա ու չեն լքի երկիրը:

Լրագրողների հարցին ի պատասխան, թե` երբ ՀԲ-ն ասում է, որ Հայաստանում տնտեսական աճ կա, գնաճը ցածր է եւ այլն, այդ դեպքում ինչո՞վ է բացատրվում Հայաստանում արտաքին ներդրումների նվազումը, ՀԲ Հարավային Կովկասի տարածաշրջանային տնօրեն Հենրի Քերալին խորհուրդ տվեց ավելի գլոբալ նայել այս հարցին ու հիշեցրեց ՀԲ-ի քույր կազմակերպության' ԱՄՀ-ի գնահատականը, որը 2,5 տոկոս տնտեսական աճ է կանխատեսել Հայաստանի համար:

«Անցյալ 10 տարիներին աշխարհում տնտեսական աճի ամենացածր ցուցանիշն է գրանցվել, եւ սա նշանակում է, որ ոչ միայն Հայաստանն է արտաքին ներդրումների նվազումը տեսնում, այլ ամբողջ աշխարհում է այդպես: Երկրորդ` Հայաստանը դեռ պետք է իր տնտեսության մրցունակությունը մեծացնի, դա առաջին հերթին նշանակում է, որ ներդրումային միջավայրը պետք է բարելավվի' ապահովվի արդար ներդրումային միջավայր, երաշխավորվի, որ ներդրողը կայուն եկամուտ կունենա ու այդ եկամուտը չի կորցնի»,- պարզաբանեց Հենրի Քերալին` հավելելով, որ բացի այդ` Հայաստանը պետք է նաեւ բիզնես միջավայրը բարելավի, ինչը նշանակում է կոռուպցիայի վերացում, պետական կառույցների աշխատանքի բարելավում:

Նրա խոսքերով' Հայաստանը պետք է մրցակցի մյուս երկրների հետ` ուղղակի ներդրումներ ունենալու համար, ունենա ավելի բարենպաստ ներդրումային ու բիզնես միջավայր, որպեսզի արտասահմանյան ներդրողները, որոնք այժմ այնքան էլ շատ չեն, գան Հայաստան: Այս առումով ՀԲ հայաստանյան գրասենյակի ղեկավարը նշեց, որ արտաքին ներդրումների համար պետք է պայքարել, քանի որ դրանք մեծ նշանակություն ունեն, քանի որ նորարարության վրա են անդրադառնում, ազդում են մրցակցության վրա , որոնք էլ տնտեսության վրա մեծ ազդեցություն ունեն: «Դրանք, փաստորեն, ազդում են նաեւ երկրի վրա, քանի որ մրցակցության պարագայում նվազում են գները»,- նշեց Ժան Միշել Հափին: