Սուրիկ Խաչատրյանի ներկայացուցիչը կարևոր փաստաթղթեր պետք է հրապարակի

Այսօր Աջափնյակ և Դավիթաշեն վարչական շրջանների ընդհանուր իրավասության դատարանում Սյունիքի նախկին մարզպետ Սուրիկ Խաչատրյանի հայցի քննության վերաբերյալ դատական նիստը  հետաձգվեց, պատճառը նրա փաստաբանի չներկայանալն էր:

Խաչատրյանի ներկայացուցիչ Մարտին Զիլֆուղարյանը դատարանին գրություն էր ուղարկել, որում հայտնել էր, որ հիվանդության պատճառով չի կարող ներկայանալ դատական նիստին, և հորդորել էր հետաձգել այն, քանի որ ցանկանում է կարևոր փաստաթղթեր հրապարակել:

Պատասխանող, Գորիսի նախկին քաղաքապետ Սամվել Հարությունյանի ներկայացուցիչ Մուշեղ Շուշանյանը նիստը հետաձգելու դեմ չառարկեց: Փաստաբանը  դատարանին հայտնեց, որ ապացույցների ենթակա փաստաթղթերի շրջանակը պատրաստ է:

Այսպիսով`  հաջորդ դատական նիստը նշանակվեց դեկտեմբերի 12-ին:

Հիշեցնենք, որ Խաչատրյանը պահանջում է հերքել Սամվել Հարությունյանի կողմից մամուլի միջոցով տարածված` իր պատիվն ու արժանապատվությունը արատավորող տեղեկությունները, իսկ որպես բարոյական վնասի փոխհատուցում` Հարությունյանից պահանջում է բռնագանձել 1.5 մլն դրամ գումար: