Հնարավոր է` Հայաստանը հետ կանգնի ՄՄ-ին միանալու որոշումից. Արծվիկ Մինասյան

Տարածքային ամբողջականության հետ միասին պետք է գործի ուժի կիրառման բացառումը և ինքնորոշման սկզբունքը: Եթե այս երեք սկզբունքներից միայն մեկն է արծարծվում Մաքսային mիության փաստաթղթերում, ուրեմն դա նահանջ է. լրագրողների հետ զրույցում ասաց ԱԺ ՀՅԴ խմբակցության պատգամավոր Արծվիկ Մինասյանը` խոսելով Մաքսային միության ինտեգրացիոն գործընթացներում Արցախի հիմնահարցի արծարծման մասին:

Նրա խոսքով` Եվրոպական ասոցացման կամ Մաքսային միության համաձայնագրով չէ, որ պետք է լուծվի Արցախի հարցը: Հայաստանին պետք է հետաքրքրի նվազագույն կորուստը, այն է` ԼՂ տարածքն ընկալվի Հայաստանի տարածքի հետ որպես մեկ միասնական տնտեսական տարածք: Այս ուղղությամբ պետք է տարվեն աշխույժ աշխատանքներ:

«Իսկ եթե հանկարծ Արցախն ընկալվի որպես Ադրբեջանի մաս, օրինակ` ըստ Ղազախստանի կամ ՄՄ այլ երկրների, միանշանակ է, որ Հայաստանն այնտեղ անելիք չունի»,- ասաց Արծվիկ Մինասյանը:

Դիտարկմանը, որ ՄՄ-ում կարող է հաշվի առնեն Ադրբեջանի կարծիքը, պատգամավորը պատասխանեց. «Իսկ Ադրբեջանն ի՞նչ կապ ունի, եթե ՄՄ երկրները բանակցում են Հայաստանի հետ: Իսկ եթե բանակցում են Արցախի հետ, ուրեմն պետք է հրավիրեն Արցախին ու Ադրբեջանին սեղանի շուրջ»:

Արծվիկ Մինասյանի խոսքով` ցանկացած միջազգային համաձայնագիր կամ միություն լծակ է Արցախի հիմնահարցի լուծման համար:

«Դեռ վաղ է ամեն բացասական բաներ տեսնել, շատ հնարավոր է, որ շուտով հստակ երևան այն գործոնները, որոնք ցույց կտան, որ Հայաստանը չի կարող Մաքսային միությանը միանալ, և Հայաստանի իշխանությունները կարող է և հետ կանգնեն այդ որոշումից»,- նշեց նա: