Պուտինի այցի ժամանակ հնարավոր է հաստատվի ՀՀ-ի՝ Մաքսային միությանը միանալու "ճանապարհային քարտեզը"

ՌԴ նախագահ Վլադիմիր Պուտինի՝ դեկտեմբերի 2-ին Երևան կատարելիք այցի ժամանակ կարող է տեղի ունենալ Եվրասիական միությանը Հայաստանի անդամակցության «ճանապարհային քարտեզի» ստորագրումը. կարծիք է հայտնում Газета.Ru-ն Պուտինի՝ Հայաստան կատարելիք այցին նվիրված հոդվածում:

Նշվում է, որ Հայաստանի շրջադարձը դեպի Ռուսաստան պատահական չէր: «Հայաստանին երաշխիքներ են հարկավոր, որ իր շահերը կպաշտպանվեն Լեռնային Ղարաբաղի հարցն Ադրբեջանի և ՆԱՏՕ-ի անդամ Թուրքիայի կողմից ռազմական ճանապարհով լուծելու պարագայում»,- գրված է հոդվածում:

Հոդվածագիրը նաև անդրադարձել է օրերս Հայաստանում ՄՄ-ին միանալու  դեմ կազմակերպված բողոքի ակցիային` նշելով, որ Հայաստանի բնակչության 2/3-ը դեմ է Սերժ Սարգսյանի այդ որոշմանը:

Հոդվածագիրը նաև նշում է, որ, ըստ ռուս փորձագետների, Հայաստանի՝ ՄՄ-ին միանալուց Ռուսաստանը տնտեսական առումով չի շահում. ՌԴ-ի և ՀՀ-ի միջև ապրանքաշրջանառությունը մեծ չէ: «Սակայն Ռուսաստանը աշխարհաքաղաքական նպատակներ է հետապնդում: Ռուսաստանը ցանկանում է հետխորհրդային տարածքում բլոկ ստեղծել, որն ավելի մեծ կշիռ կունենա, քան միայն Ռուսաստանը»,- ասվում է հոդվածում: