Դատախազության անշարժ գույքը "մանրից" վաճառում են

Կառավարությունն իր այսօրվա նիստում որոշեց Երեւանի Հանրապետության փողոցի թիվ 85 հասցեում գտնվող եւ ՀՀ գլխավոր դատախազությանը պատկանող 104.4 քառակուսի մետր ընդհանուր մակերեսով անշարժ գույքը օտարել:

47.0 քառակուսի մետր մակերեսով կաթսայատունը և 57.4 քառակուսի մետր մակերեսով ենթակայանը, դրա զբաղեցրած, օգտագործման ու սպասարկման համար անհրաժեշտ 0.0331 հա հողատարածքի, ինչպես նաև 71 միավոր մեքենաներ և սարքավորումների հետ միասին ուղղակի վաճառքի ձևով կօտարվի «Բիզնես Պլաս» սահմանափակ պատասխանատվությամբ ընկերությանը:

Ընդունված որոշմամաբ կառավարությունը սահմանեց, որ այս տարվա օգոստոսի 26-ի դրությամբ օտարվող գույքի գնահատված արժեքը կազմում է 124 միլիոն 236 հազար դրամ, որից անշարժ գույքի արժեքը` 123 միլիոն 369.9 հազար դրամ, իսկ մեքենաների և սարքավորումների արժեքը` 865.8 հազար դրամ. Գնորդը պարտավոր է վճարել նաև գույքի զբաղեցրած, օգտագործման ու սպասարկման համար անհրաժեշտ 0.0331 հա հողատարածքի կադաստրային արժեքը` 19 միլիոն 860 հազար դրամը:

Այս գույքը գնող «Բիզնես Պլաս» ՍՊԸ-ն պարտավոր է նաև 3 տարվա ընթացքում կատարել 8 միլիոն դրամի ներդրում` յուրաքանչյուր տարի հավասարաչափ, ինչպես նաև միջոցների հաշվին վճարել պայմանագրից բխող գույքային իրավունքների պետական գրանցման համար օրենքով սահմանված գումարներն ու տուրքերը, սյինքն` 1 քառակուսի մետրի համար 60 հազար դրամ: