Դժգոհության դեպքում վարորդները կարող են կապվել ՃՈ պետի հե՞տ

«Աքիլլես» վարորդների իրավունքների պաշտպանության կենտրոնը նախագիծ է ներկայացրել ԵԱՀԿ հայաստանյան գրասենյակ, ստացել ֆինանսավորում` վարորդ-տեսուչ հարաբերություններում ամենահաճախակի հանդիպող 6 օրինախախտումների մասին բուկլետներ տպելու համար, սակայն, արդյունավետ կլինե՞ն վերոհիշյալ բուկլետները, թե՞ ոչ, փոքր-ինչ կասկածելի է:

Սակայն «Աքիլլես» վարորդների իրավունքների պաշտպանության կենտրոնի տնօրեն Էդուարդ Հովհաննիսյանի հավաստմամբ` «Շտապ օգնություն վարորդներին» վերնագրով` մոտ 60.000 օրինակով տպված բուկլետները կօգնեն վարորդներին պաշտպանել իրենց իրավունքները, եթե համաձայն չեն տեսուչի արձանագրած խախտման հետ: Ավելին` կենտրոնի ղեկավարը համոզված է, որ նման դեպքերում յուրաքանչյուր վարորդ կարող է զանգահարել հերթապահ բաժին,  նույնիսկ` ՃՈ պետին:

Այստեղից էլ տրամաբանորեն ծագեց մի հարց` Հայաստանի պայմաններում հնարավո՞ր բան է, որ ցանկացած վարորդ, ով համաձայն չէ տեսուչի արձանագրած խախտման հետ, կարողանա անմիջապես կապվել ՃՈ պետի հետ և հայտնել իր դժգոհությունը:

«Ինչ եք ուզում մեզնից, մեր կազմակերպությունից հասնում էր համարը տեղադրելը, մենք էլ տեղադրել ենք»,- պատասխանեց Էդուարդ Հովհաննիսյանը:

Իսկ հարցին, թե ինչո՞ւ կազմակերպությունը չի արձագանքում վճարովի ավտոկանգառների խնդրին և այստեղ էլ չի պաշտպանում վարորդների շահերը, Հովհաննիսյանը պատասխանեց, որ սպառողների պաշտպանության բազմաթիվ այլ կազմակերպություններ գոյություն ունեն, դրանով էլ թող դրանք զբաղվեն: