Ազատամարտիկները դարձյալ նստացույց են անում

Մի խումբ ազատամարտիկներ Հանրապետության հրապարակում նստացույց են հայտարարել՝ ի պաշտպանություն ազատամարտիկ, պահեստազորի փոխգնդապետ Վոլոդյա Ավետիսյանի։ Նրանք նաեւ բարձրաձայնում են այն խնդիրները, որոնց համար արդեն տեւական ժամանակ է, ինչ նստացույց են անում Ազատության հրապարակում:

Ազատամարտիկների խոսքերով` Վոլոդյա Ավետիսյանին ձերբակալելով` իշխանությունը ցանկանում է իրենց պայքարը չեզոքացնել, իսկ մեղադրանքը համարում են շինծու:

Նշենք, որ սեպտեմբերի 20-ին ձերբակալվել, իսկ այսօր երկամսյա ժամկետով կալանավորվել է ազատամարտիկ Վոլոդյա Ավետիսյանը: Նրան մեղադրանք է առաջադրվել Քրեական օրենսգրքի 178-րդ հոդվածի 2-րդ մասի 2-րդ կետի հատկանիշներով՝ խարդախություն՝ խոշոր չափերով:

Ըստ գործի՝ Վոլոդյա Ավետիսյանը խաբեության եւ վստահությունը չարաշահելու եղանակով քաղաքացի Հ. Զաքարյանի թոռանը պարտադիր ժամկետային զինվորական ծառայությունից ազատելու հարցում աջակցություն ցույց տալու պատրվակով Հ. Զաքարյանից հափշտակել է 2000 ԱՄՆ դոլար գումար: