Վրաստանում ձերբակալվել է երկրի խորհրդարանը պայթեցնել սպառնացողը

Վրաստանի ՆԳՆ-ն ձերբակալել է «հեռախոսային» ահաբեկչի, ով երեկ սպառնացել էր պայթեցնել երկրի խորհրդարանը: Ձերբակալվածը 17 տարեկան Լեւան Տ.-ն է, որը 112 ծառայություն էր զանգահարել եւ հայտնել, որ խորհրդարանի շենքում ռումբ կա. տեղեկացնում է Trend գործակալությունը:

Այդ տեղեկատվությունը ստանալուց հետո խորհրդարանի նիստը հապշտապ ավարտվել էր, պատգամավորներին եւ աշխատակիցներին տարհանել էին շենքից, որն այնուհետեւ շրջափակվել էր: Սակրավորներն ամբողջ գիշեր փնտրել են ռումբը, սակայն չեն գտել:

Ձերբակալվածն ընդունել է իր մեղքը: Թե ինչու է նա նման քայլ կատարել, դեռեւս անհայտ է: Ի դեպ, 2 ամիս առաջ Թբիլիսիում մի թոշակառու էր ձերբակալվել, որը նման ձեւով փորձել էր ուշադրություն հրավիրել երկրի սոցիալական քաղաքականության վրա: