Մեր պահանջը պետք է լսելի դառնա Թուրքիային. Գասպար Կարապետյան

Հոկտեմբերի 14-15-ը  Բրյուսելում կանցկացվի Եվրոպահայերի 3-րդ համագումարը: Լրագրողների հետ հանդիպման ժամանակ կազմակերպվելիք համագումարի մասին խոսեց Հայ  դատի Եվրոպայի հանձնախմբի նախագահ Գասպար Կարապետյանը:

Ըստ նրա` Եվրոպահայերի երրորդ համագումարին ներկայացուցիչներ կլինեն  Հայաստանից, Արցախից, ինչպես նաև  եվրոպական տարբեր երկրներից: Համագումարն իր ներկայությամբ կպատվի նաեւ Մեծի Տանն Կիլիկիո կաթողիկոս Արամ Առաջինը:

Կարապետյանի խոսքով` համագումարի օրակարգի առաջին խնդիրը  2015-ին Հայոց ցեղասպանության 100-րդ տարելիցին պատրաստվելն է: «Մենք պետք է միմյանց հետ համագործակցենք և հասնենք անպիսի քայլերի, որպեսզի մեր պահանջներն ավելի լսելի դառնան  Թուրքիայի և միջազգային հանրության համար»,- ասաց նա:

Ըստ Հայ  դատի Եվրոպայի հանձնախմբի նախագահի` իրենք կարող են հաճախակի  կազմակերպել համագումարներ, սակայն, միայն մարդկանց հրավիրելով և խոսելով չէ, պետք է որոշակի  աշխատանքներ կատարված լինեն, որպեսզի դրանք քննարկվեն:

Նշենք, որ  Եվրոպահայերի առաջին համագումարը տեղի է ունեցել 2003-ին, իսկ երկրորդը` 2007-ին: