Իզուր չեն ասում՝ Սուրիկի մարզ

Եթե Սյունիքի ժողովուրդն անհրաժեշտ հետևություններ չանի նորանշանակ մարզպետ Վահե Հակոբյանի՝ մարզպետարանի աշխատակազմի, համայնքի ղեկավարների եւ տարբեր կառույցների պատասխանատուների հետ հանդիպման ժամանակ ունեցած ելույթից, կարճ ժամանակ անց վկան է դառնալու մարզում Սուրիկ Խաչատրյանի նորանոր հերոսությունների:

Մինչ երիտասարդ մարզպետի հանճարեղ մտքերին անդրադառնալը, ընթերցողի ուշադրությունը հրավիրենք մի հանգամանքի վրա: Սուրիկ Խաչատրյանն, իր դիմումի համաձայն, կառավարության որոշումով ազատվել է աշխատանքից: Այսինքն` կառավարության այդ որոշման մեջ ոչ մի ակնարկ անգամ չկա, որ այն կայացվել է Գորիս քաղաքում՝ մարզպետ Սուրիկ Խաչատրյանի առանձնատան հարևանությամբ տեղի ունեցած կրակոցների և դրանց արդյունքում կատարված սպանության մասին: Այսինքն` ցանկացած պահի կարելի է պնդել, որ Սուրիկ Խաչատրյանը հոգնածության, այլ աշխատանքի անցնելու և կամ առողջական խնդիրների պատճառով է դիմում գրել և ազատվել զբաղեցրած պաշտոնից: Օրերս լրատվություն հայտնվեց այն մասին, թե Սուրիկ Խաչատրյանն է իր խորհուրդներով օգնել Սերժ Սարգսյանին, որ հենց Վահե Հակոբյանին նշանակեն Սյունիքի նոր մարզպետ: Սրա ճիշտն ու սխալը երևի կարող է միայն ՀՀ նախագահը ասել, բայց ՀՀ նախագահը լռում է և լռում է այնպես, ինչպես լռեց՝ իմանալով Գորիսի դեպքի՝ Բուդաղյան եղբայրներից մեկի սպանության, իսկ մյուսի վիրավորվելու մասին: Նախագահի կողքին Սուրիկ Խաչատրյան խորհրդականի ներկայությունը ևս մեկ փաստ է` մտածելու համար, որ Սուրիկ Խաչատրյանն ամենևին էլ վերոնշյալ դեպքի կապակցությամբ չէ, որ աշխատանքից ազատման դիմում է գրել: Եվ էլի մեկ բան՝ մարզի բնակչությանը նոր մարզպետը ներկայանում է ոչ թե նախագահի կամ վարչապետի ուղեկցությամբ, ինչը տրամաբանական կլիներ գոնե այս աղմկոտ իրադարձություններից հետո, այլ դարձյալ` Սուրիկ Խաչատրյանի, ինչը վերջնականապես հիասթափեցնող է, եթե չասենք կատարյալ անզգամ վերաբերմունք մարզի բնակչության նկատմամբ: Դա ուղղակի խոսում է այն մասին, որ նորանշանակ մարզպետը պարզապես դրածո է, խամաճիկ, իսկ իրականում Սյունիքը շարունակելու է ղեկավարել Լիսկան: Նման բան կարող էր լինել միայն մեկ դեպքում՝ եթե Լիսկան նաղդ փողով գնած լիներ ողջ մարզը: Կմտածեինք՝ իշխանություններն անում են առավելագույնը՝ նրան որոշ ժամանակ ստվերում պահելու համար` մինչև «անցնի վտանգը»: Ինչքան չլինի` մարդը նաղդ փողով գնել է մարզը, իսկ անձնական սեփականությունը, ինչպես գիտեք, մեր երկրում անձեռնմխելի է:

Այս ամենն իբր քիչ էր, մի հատ էլ նորանշանակ մարզպետն է ելույթ ունենում մարզպետարանի աշխատակիցների, համայնքապետերի առաջ ու մարզը շենացնելու իր պիոներակոմերիտական կոչերով ուղղակի փաստում, որ ինքն, այո, այստեղ նշանակվել է զուտ մթնոլորտ կարգավորելու և Լիսկայի ու ժողովրդի միջև միջնորդ լինելու համար: Ավելին ասենք՝ նա շնորհակալություն է հայտնել երկրի ղեկավարությանը` չմոռանալով Լիսկային` իրեն վստահելու համար, որից էլ ինքն այսքան ոգևորված է: Նորելուկ մարզպետը, պատկերացրեք, բարձր է գնահատել մարզում Սուրիկ Խաչատրյանի, բռնվեք, որ չընկնեք, որակյալ աշխատանքը: Իսկ ո՞ւր է նորանշանակ մարզպետի գնահատականը տեղի ունեցած դեպքերին և բոլոր այն արտառոց երևույթներին, որոնք տեղ են գտել Սուրիկ Խաչատրյան որակյալ մարզպետի իշխանության երկարուձիգ տարիներին: Եթե չկա այդ գնահատականը, նշանակում է կոմերիտականի տարիքում գտնվող նորանշանակ մարզպետը շարունակելու է Լիսկայի թողած ավանդույթները, նշանակում է, որ նրա մտքի ծայրով իսկ չի անցնում, թե փոխարինելու է եկել մեկին, ում հեռացրել են աշխատանքից «մարզպետ» հասկացությանը չհամապատասխանելու համար: Ինչպես ասում են՝ մեղքն իր վիզը: Վահե Հակոբյանը մտնում է մի աղաղակող պատմության մեջ, որը դժվարանում ենք ասել, կկարողանա՞ մարսել երկրի բարձր իշխանությունը, թե՞ ոչ: Գիտակցո՞ւմ է, արդյոք, այս կոմսոմոլ երիտասարդը, որ այդ պատմության մեջ է ընկնում ամենահասարակ վինտիկի կարգավիճակում, վինտիկ, որը շարունակելու է պտտել Լիսկան՝ ՀՀԿ-ական մեծավորների հրահանգներով:

Էդիկ ԱՆԴՐԵԱՍՅԱՆ