Իտալիան Օջալանին խաղաղության մրցանակի է արժանացրել

Իտալիայի խաղաղության միջազգային բյուրոն խաղաղության մրցանակի է արժանացրել Քրդական բանվորական կուսակցության ղեկավար Աբդուլլահ Օջալանին:

Ըստ Demokrathaber-ի՝ այդ մասին բյուրոն հայտարարություն է տարածել, որում ասվում է. «Քրդերը Մերձավոր Արևելքի դժվարին պայմաններում պայքարում են «Իսլամական պետության» և այլ ճնշումների դեմ, և, որպես քրդերի՝ ազատության համար մղած պայքարի խորհրդանիշ, Օջալանին խաղաղության մրցանակի ենք արժանացնում»:

Հայտարարության մեջ նշվել է նաև, որ «քրդերին վերջին 20 տարիների ընթացքում հաջողվել է  զինյալ պայքարը միաժամանակ տեղափոխել քաղաքական քննարկումների դաշտ, ինչի ապացույցն էլ քրդական Ժողովուրդների դեմոկրատական կուսակցությունը»:

Ըստ բյուրոյի հայտնած տեղեկությունների՝ բանտարկության մեջ գտնվող Օջալանին ազատ արձակելու  համար հավաքված ստորագրությունների քանակը կազմել է 10 միլիոն 264 հազար, սակայն դրանք ոչ մի արձագանք չեն գտել: «Բյուրոն այս քայլով նպատակ ունի աջակցել քուրդ ժողովրդի մղած պայքարին»,- ասվում է հայտարարության մեջ:

Մրցանակը կհանձնվի 2016 թվականի հունվարի 26-27-ին կայանալիք համաժողովի ժամանակ:

Հետաքրքիր է՝ Օջալանին «ահաբեկիչների» ցուցակում ներառած Թուրքիան ինչպե՞ս կարձագանքի իտալական բյուրոյի այս քայլին: