Կոստա Ռիկան սխալմամբ օրինականացրել է միասեռ ամուսնությունները

Կոստա Ռիկան լատինաամերիկյան երրորդ երկիրն է, որ օրինականացրել է միասեռ ամուսնությունները, ընդ որում` այդ արմատական որոշումը խորհրդարանը կայացրել է անգիտաբար: Օրենսդիրները, համապատասխան օրենքում փոփոխություններ անելով, կարծել են, թե ընդամենը ինչ-որ ձեւակերպումներ են փոխում, սակայն պարզվել է, որ իրականում, սողանցք են ստեղծել, որը հնարավորություն է տալիս միասեռականներին օրինականորեն ձեւակերպել իրենց հարաբերությունները: Գլխի ընկնելով, թե ինչ է կատարել, պատգամավորները դիմել են երկրի նախագահ Լաուրա Չինչիլիեին, որպեսզի նա օգտվի վետոյի` իր իրավունքից, սակայն նախագահը հրաժարվել է ուղղել պատգամավորների սխալը եւ ստորագրել է օրենքը. տեղեկացնում է NEWSru.com-ը:

Այս կապակցությամբ The Costarican Times թերթը գրել է. «Եթե ազգային ընտրյալների համար նորմ է օրինագծերը չկարդալը, ինչի համար են նրանց վճարում»: Ապա հավելել, որ երկրի նախագահը ճիշտ է արել, որ ստորագրել է օրենքը, որպեսզի պատգամավորները հասկանան` հարկավոր է կարդալ օրինագծերը, այլ ոչ թե մտածել` որտեղ անցկացնել արձակուրդը: