Ռումինացիները բողոքի են դուրս եկել երկրի նախագահի վիրավորական խոսքերի պատճառով

Բուխարեստում ոչ կառավարական կազմակերպությունների ներկայացուցիչներն այսօր ցույցի են դուրս եկել երկրի նախագահ Տրայան Բեսեսկուի դեմ` նրա վիրավորական խոսքերի պատճառով: Իրավապաշտպաններին վրդովեցրել է պետության ղեկավարի կոչը երկրում ծնելիության մակարդակը բարձրացնելու մասին: «Ես ձեզ կոչ եմ անում ծնել: Կարծում եմ, որ այդ խնդիրը կարող էր մտահոգել նաեւ ռումինացի կանանց, այլ ոչ միայն գնչուհիներին, որոնք 3-4 երեխա ունեն»,- ասել էր Բեսեսկուն` երեկ ելույթ ունենալով Business Woman ամսագրի կազմակերպած` կանանց հետ հանդիպման ժամանակ. տեղեկացնում է ИТАР-ТАСС-ը:

Իրավապաշտպան կազմակերպությունները նման համեմատությունը համարել են վիրավորական: Համատեղ հայտարարության մեջ նրանք գրել են, որ «նախագահի արտահայտությունները քաղաքացիների արժանապատվության դեմ հարձակումներ են, պարունակում են խտրական մանրամասներ քաղաքացիների տարբեր կատեգորիաների վերաբերյալ եւ քաղաքական դասի ներկայացուցչի վարքագծի կոպիտ խախտում են»:

Բեսեսկուն ժամանակին նավապետ է եղել եւ լավ գիտի «թունդ» խոսքի արժեքը: Նա բազմիցս իրեն արտահայտություններ է թույլ տվել գնչուների, իր քաղաքական ընդդիմախոսների հասցեին: