Դպրոց է փակվում

«Ժողովուրդ»-ը Սյունիքի մարզի Արևիս համայնքի ղեկավար Սասուն Սահակյանից տեղեկացել է, որ առաջիկայում գյուղի դպրոցը փակվելու է, քանի որ դպրոցի աշակերտների թիվը երեքն է:

«Այս տարի դպրոց հաճախելու մի երեխա կա, բայց նրա ծնողներն ուզում են գյուղից մեկնել Ռուսաստանի Դաշնություն: Եթե մեկնեն, դպրոցը կփակվի: Այս տարի դեռ ոչ մի ընտանիք գյուղից դուրս չի եկել, իսկ անցյալ տարի միանգամից հինգ ընտանիք հեռացավ: Հիմա գյուղում ապրում է 70 մարդ»,-ասել է գյուղապետը:

Նրա խոսքով՝ հիմնականում երիտասարդներն են մեկնում գյուղից. «Գրադարան, բուժկետ, ամեն ինչ ունենք, բայց մարդ չկա: Անգամ գրադարանն աշխատող չունի, քանի որ համայնքապետարանի բյուջեն փոքր է, և հնարավորություն չունի վճարելու»:

Ըստ համայնքի ղեկավարի՝ տարիներ առաջ դպրոցի աշակերտները 23-ն էին: Բնակիչների եկամտի միակ աղբյուրն անասնապահությունն է ու գյուղատնտեսությունը: Իսկ վերջին երեխան Արևիսում ծնվել է երկու տարի առաջ: