Գյուղմթերքի շուկաները` առանց արմավիրցիների որակյալ մթերքի

Հուլիսից  Երևանում կբացվեն գյուղատնտեսական մթերքի երեք բացօթյա տոնավաճառներ: Այս մասին լրագրողների հետ հանդիպման ժամանակ հայտարարեց ՀՀ գյուղատնտեսության փոխնախարար Ռոբերտ Մակարյանը:

Առաջինը կբացվի «Մալիբու» սրճարանի մոտակայքում, երկրորդը` Կասյան եւ Կոմիտաս փողոցների հարակից տարածքում: Հնարավոր է վերաբացվի նաև «Այրարատ» կինոթատրոնի հարակից փողոցում գտնվող տոնավաճառը:

Փոխնախարարը վստահեցրեց, որ գյուղատնտեսական տոնավաճառներում  մթերքը 10-15  տոկոսով ավելի էժան է: Նա հիշեցրեց, որ նախորդ տարի այդ բացօթյա տոնավաճառներն օրական մինչև 5600 այցելու են ունեցել:

Yerkir.am-ի հարցին` արդյո՞ք կարկտահարված մարզերի, մասնավորապես` Արմավիրի բերքի պակասը շուկայում չի նկատվի, փոխնախարարը պատասխանեց, որ հնարավոր է նվազի որակյալ գյուղատնտեսական ապրանքների քանակը: