Կյանքը շարունակվում է

Ամերիկուհի գրող եւ բանաստեղծուհի Մայա Անջելուի մտքերից

Ես հասկացել եմ, որ, անկախ ամեն ինչից, անկախ նրանից, թե որքան շատ են վատ իրադարձությունները, կյանքը շարունակվում է, եւ վաղը այն ավելի լավն է դառնալու: Ես հասկացել եմ, որ մարդկանց մասին կարելի է կարծիք կազմել` հաշվի առնելով նրանց վերաբերմունքը անձրեւոտ եղանակի, կորած լեզուների եւ Ամանորի տոնածառի խճճված լույսերի հանդեպ: Հասկացել եմ, որ, անկախ ծնողներիդ հետ եղած վատ հարաբերություններից, դու նրանց կկարոտես, երբ հեռանան կյանքիցդ:

Ես հասկացել եմ, որ ապրուստ հայթայթելը ապրելու հետ կապ չունի: Հասկացել եմ, որ կյանքը երկրորդ հնարավորությունն է տալիս: Ես հասկացել եմ, որ չես կարող ապրել բռունցքներդ փակ, անպայման պետք է ինչ-որ մի բան նետես: Ես հասկացել եմ, որ բաց սրտով որոշում կայացնելը սովորաբար ճիշտ է լինում:

Ես հասկացել եմ, որ անգամ, երբ ցավեր ունեմ, ինքս չպետք է ցավ դառնամ: Հասկացել եմ, որ յուրաքանչյուր օր պետք է ձգտել ու հասնել ինչ-որ մեկին: Մարդիկ սիրում են ջերմ գրկախառնությունը կամ հասարակ հպումը: Ես հասկացել եմ, որ դեռ շատ բան ունեմ սովորելու: Ես հասկացել եմ, որ մարդիկ կմոռանան այն ամենը, ինչ արել ես իրենց համար կամ ինչ ասել ես, բայց նրանք երբեք չեն մոռանա այն զգացողությունները, որ պարգեւել ես նրանց:

Թարգմանությունը` Էդիթ ՄԱՐԳԱՐՅԱՆԻ