Կարոտով ենք վերադարձել բեմ. Կամո Հովհաննիսյան

Ալ. Սպենդարյանի անվան օպերայի եւ բալետի ազգային ակադեմիական թատրոնի բեմի սպասարկող անձնակազմը երանության մեջ է. այսօր լրագրողների հետ հանդիպման ժամանակ հայտարարեց թատրոնի տնօրեն Կամո Հովհաննիսյանը:

Հիշեցնենք, որ այնտեղ շաբաթներ առաջ են ավարտվել վերանորոգման եւ բեմի վերազինման աշխատանքները: Հովհաննիսյանի տեղեկացմամբ` ծախսվել է շուրջ 8 միլիոն եվրո, սակայն արվել է աշխատանք, որը դեռ երկար տարիներ կծառայի հանրությանը:

«Բեմը սպասարկող սարքավորումները լիովին փոխվել են, եւ բոլոր սարքերը եվրոպական են: Օրինակ` ձայնային ղեկավարման նոր վահանակ ենք գնել, որը նաեւ ձայնագրման հնարավորություն ունի, այսինքն` դրանով իսկ եւս մեկ կարեւոր հարց է լուծվում: 1 տարի 8 ամիս ներկայացում չէինք խաղացել, հիմա կարոտով ենք վերադարձել բեմ»,- ասաց Հովհաննիսյանը:

Ըստ նրա` լուծվել է նաեւ գլխավոր խնդիրը` ջեռուցման հարցը, ինչի բացակայության պատճառով նախկինում միայն տաք եղանակին էին ներկայացումներ խաղում:

«Աշխարհում օպերային թատրոն ունեցող երկրները հպարտանում են այդ փաստով, իսկ մենք պետք է կրկնակի հպարտ լինենք, քանի որ մեր թատրոնը` իր ճարտարապետական գեղեցկությամբ, աշխարհի լավագույն թատրոնների շարքում է: Օրինակ` Լա Սկալայի կողքով անցնելիս երբեք չես ասի, որ նման մեծ արժեք ունեցող շենքի կողքով ես քայլում»,- ասաց Հովհաննիսյանը: