ՀՅԴ-ն քայլարշավը` հանուն բարեկեցիկ Երեւանի

Երեւանի ավագանու ընտրությունների քարոզարշավի փուլում ՀՅԴ համամասնական ցուցակի ներկայացուցիչները, ԱԺ ՀՅԴ խմբակցության պատգամավորներն ու ՀՅԴ թիմի անդամներն այսօր քայլարշավ էին կազմակերպել Կոմիտասի պողոտայով:

Ընտրությունների նախընտրական քարոզարշավի այս փուլում, ինչպես նշեց ՀՅԴ Հայաստանի Գերագույն մարմնի փոխներկայացուցիչ Արսեն Համբարձումյանը, ՀՅԴ քարոզչական թիմը նպատակահարմար է գտել այս ձեւով քարոզչություն իրականացնել: Նա լրագրողներին ասաց, որ ՀՅԴ-ի պարագայում մինչեւ այսօր քարոզարշավն անցել է բնականոն, եւ իրենք դժգոհելու առիթ չունեն:

Իսկ ինչ վերաբերում է ընտրություններում ՀՅԴ ակնկալած շանսերին, ՀՅԴ ԳՄ փոխներկայացուցիչը նշեց, որ, դատելով բակային հանդիպումներից, տուն առ տուն իրականացվող քարոզարշավից, ՀՅԴ-ն բավականին լավ պատկեր է ստացել, որը շահեկանորեն տարբերվում է այն վիճակից, ինչ ունեցել են անցյալ տարի կայացած խորհրդարանական ընտրություններում:

ՀՅԴ քարոզչական խմբերը քայլարշավի ընթացքում անցորդներին բաժանում էին ՀՅԴ նախընտրական ծրագրերն ու բուկլետները եւ խնդրում առաջիկա ընտրություններում իրենց ձայնը տալ Դաշնակցությանը:

«Մեր գլխավոր խնդիրն է մեր ծրագրերը տեղ հասցնել ընտրողներին, որպեսզի մեր քաղաքացիները լիարժեք պատկերացում ունենան մեր ծրագրերից: Ներկայացնում ենք մեր ծրագրային տարբերությունները մյուս ուժերից եւ դեպի միասնություն ձգտող մեր կամքը»,- նշեց քայլարշավի մասնակից, ԱԺ ՀՅԴ խմբակցության պատգամավոր Արծվիկ Մինասյանը:

Քայլարշավը, որն սկսվել էր Կոմիտասի պողոտայում գտնվող «Երեւան Սիթի» սուպերմարկետի մոտից, հասավ մինչեւ  Երեւանի մետրոպոլիտենի «Բարեկամություն» կայարան, որտեղ ՀՅԴ ներկայացուցիչները փոքրիկ հանրահավաք-հանդիպում ունեցան քաղաքացիների հետ: