ԱՄՆ-ում ցմահ ազատազրկվել է 18-ամյա երիտասարդ

ԱՄՆ-ում դատարանը ցմահ ազատազրկման է դատապարտել 18-ամյա Թի Ջեյ Լեյնին, ով նախորդ տարվա փետրվարին Օհայոյի դպրոցներից մեկի ճաշարանում սպանել է երեք անչափահասի: Դատարանն իր դատավճռով Լեյնին զրկել է վաղաժամկետ ազատ արձակվելու իրավունքից:

Դատական նիստին Լեյնը ներկայացել է սպիտակ շապիկով, որին սևով ընդգծված գրված է եղել` «մարդասպան»: Իսկ վերջին խոսքն ասելուց հետո նա հայհոյանք նշանակող ժեստեր է ցույց տվել սպանված երեխաների հարազատներին, դատավճռի հրապարկման ժամանակ քմծիծաղ է տվել. գրում է ИТАР-ТАСС-ը:

Դեպքը տեղի է ունեցել փետրվարի 27-ին, Լեյնը մտել է ճաշարան, կրակ բացել, սպանվել է 16-17 տարեկան երեք անչափահաս, իսկ երկու հոգի էլ վիրավորվել է: Կալանավորելուց հետո Լեյնը դատաբժշկական փորձաքննություն է անցել, ինչի արդյունքում ճանաչվել է մեղսունակ, թեեւ հալյուցինացիաներ է ունենում և տառապում է պսիխոզով: Այս տարվա փետրվարի 26-ին Լեյնը ընդունել է իր մեղքը, սակայն չի ասել կատարածի պատճառների մասին: