Վիեննայի ֆիլհարմոնիկ նվագախումբը` Հայաստանում

Ապրիլի 11-ին Վիեննայի ֆիլհարմոնիկ նվագախմբի համերգով կբացվի «Երեւանյան հեռանկարներ» միջազգային երաժշտական փառատոնի 14-րդ համերգաշրջանը: Նվագախումբը կղեկավարի 11 «Գրեմմիի» արժանացած ամերիկացի հռչակավոր դիրիժոր Մայքլ Թիլսոն Թոմասը:

Լրագրողների հետ հանդիպման ժամանակ փառատոնի հիմնադիր Ստեփան Ռոստոմյանը նշեց, որ փառատոնը դարձել է Հայաստանի այցեքարտը, եւ մի շարք երկրներ փառատոնի միջոցով են ճանաչում Հայաստանը: Ըստ նրա` եթե փառատոնի մեկնարկը տրվում է Վիեննայի նվագախմբի համերգով, ապա փառատոնը կավարտվի եւս մի շքեղ համերգով` Սիդնեյի նվագախմբի, որի հետ, ինչպես նշեց Ռոստոմյանը, նաեւ մեկ հայ մենակատար կնվագի:

«Վիեննայի նվագախմբի համերգին ներկա լինելը պատիվ է անգամ իրենց երկրի քաղաքացիների համար: Այնտեղ համերգների տոմսերը սպառվում են տարիներ առաջ, իսկ նվագախումբն ինքն է ընտրում, թե ով պետք է մասնակցի համերգին: Վիեննայի նվագախումբը դասական երաժշտության իրական դեմքն է, որտեղից «ծնվել» են Մոցարտը, Բեթհովենը, Հայդնը»,- ասաց Ռոստոմյանը:

Ըստ նրա` այժմ աշխարհի ամենամեծ ճանաչում ունեցող երաժիշտներն իրենք են դիմում` փառատոնին մասնակցելու, քանի որ դա նրանց համար պատիվ է. «Այժմ էլ «Լա Սկալա» օպերային թատրոնի ֆիլհարմոնիկ նվագախումբը առաջարկ-խնդրանք է ներկայացրել` փառատոնին մասնակցելու»: