Վիեննայի նվագախումբը ղեկավարել է նաեւ Արամ Խաչատրյանը

Այսօր «Արամ Խաչատրյան» համերգասրահում, «Երեւանյան հեռանկարներ» փառատոնի շրջանակներում, տեղի կունենա Վիեննայի ֆիլհարմոնիկ նվագախմբի համերգը:

Նվագախմբի դիրիժոր Մայքլ Թիլսոն Թոմասը լրագրողների հետ հանդիպման ժամանակ նշեց, որ արդեն հասցրել է զգալ, որ հայերը երաժշտություն շատ են սիրում, ինչպես նաեւ կատարման ժամանակ զգում են յուրաքանչյուր նոտան: Ըստ նրա` «Արամ Խաչատրյան» համերգասրահը հիանալի՝ պարզ ու հստակ հնչողություն ունի:

«Այսօր հայկական հիմնն ենք կատարելու: Այնպես չէ, որ ինչ երկիր գնում ենք, տեղի հիմնն անպայման կատարում ենք, բայց Հայաստանի դեպքում՝ այո, որոշեցինք մի անակնկալ մատուցել»,- ասաց դիրիժորը:

Yerkir.am-ի դիտարկմանը` տեղյակ ենք, որ տարիներ առաջ նվագախումբը ինչ-որ համերգի ժամանակ ղեկավարել է Արամ Խաչատրյանը, եւ կուզեինք մանրամասներ իմանալ դրա հետ կապված, նվագախմբի նախագահ Կլեմենս Հելսբերգը նշեց, որ, այո, տասնյակ տարիներ առաջ Վիեննայի ֆիլհարմոնիկ նվագախումբը ղեկավարել է Արամ Խաչատրյանը:

«1961 թվականն էր, եւ Խաչատրյանը երկու համերգ ղեկավարեց, երբ կատարում էինք իր ստեղծագործությունները՝ «Գայանե»-ից մի հատված եւ «Դաշամուրի կոնցերտ թիվ 2»-ը: Մենք նաեւ Հայաստանում Քրիստոնեության ընդունման 1700-ամյակին նվիրված մեր համերգներից մեկի ժամանակ կատարեցինք Սարգիս Ղազարյանի «Ավետիսը»: Համերգը ղեկավարում էր Գերգիեւը»,- ասաց Հելսբերգը: