Սերժ Սարգսյանը Պինոչետից ավելի լավ տղա չէ. Անդրիաս Ղուկասյան

Հացադուլ հայտարարած Րաֆֆի Հովհաննիսյանին այսօր Ազատության հրապարակում այցելել էր նաեւ նախագահի նախկին թեկնածու Անդրիաս Ղուկասյանը:

Լրագրողների հետ զրույցում նա նախ հստակեցրեց, որ Րաֆֆի Հովհաննիսյանի հացադուլին միանալու ցանկություն չի հայտնել, բայց եթե հարկ լինի, իհարկե, կմիանա:

Yerkir.am-ի հարցին` ի՞նչ կարող է տալ Հովհաննիսյանի հացադուլը, Ղուկասյանը պատասխանեց, որ անհրաժեշտ է իշխանություններին վերջնագիր ներկայացնել եւ պահանջել, որ Սերժ Սարգսյանն ինքնաբացարկ հայտնի: Մեր դիտրակմանը` մի՞թե իրատեսական է նման պահանջը` հաշվի առնելով այն փաստը, որ իշխանություններն ամուր կառչած են իրենց աթոռներից, Ղուկասյանն արձագանքեց. «Կառչած են, թե կառչած չեն աթոռներից, նշանակություն չունի: Որոշ քաղաքական գործիչների լեզվով ասած` հաստատ Սերժ Սարգսյանը Պինոչետից ավելի լավ տղա չէ: Պինոչետն ավելի քիչ կառչած չէր իր աթոռից, սակայն իր կյանքն ավարտեց բանտում: Այսինքն` ամեն ինչ կախված է հանրության կամքից»:

Դիտարկմանն էլ, որ Րաֆֆի Հովհաննիսյանը հայտարարել է, թե ապրիլի 9-ին Սերժ Սարգսյանը կերդվի միայն իր դիակի վրայով, արդյո՞ք բանը դրան կհասնի, Ղուկասյանը պատասխանեց. «Սերժ Սարգսյանը 2008թ.-ին երդվել է 10 մարդու դիակների վրա, եւ առհասարակ Սերժ Սարգսյանի համար մարդկանց դիակների վրա երդվելը բարդ հոգեբանական խնդիր չէ: Թվում էր, թե դեռ հոկտեմբերի 27-ից հետո, ԱԱԾ պետ Սերժ Սարգսյանը պետք է ավարտեր իր քաղաքական կարիերան եւ ամբողջ կյանքում հանրության աչքին չերեւար: Որեւէ քաղաքացու մահը քրեաօլիգարխիկ համակարգի համար խոչընդոտ չէ` իր իշխանությունը պաշտպանելու համար»: