Բժիշկներն Անդրիաս Ղուկասյանին լավ բան չեն ասում

ՀՀ առողջապահության նախարարի առաջին տեղակալ Հայկ Դարբինյանը երեկ երեկոյան, պրոֆ. Ռ. Յոլյանի անվան արյունաբանական կենտրոնի տնօրեն Սմբատ Դաղբաշյանի ուղեկցությամբ, երկրորդ անգամ այցելել է ՀՀ նախագահի թեկնածու Անդրիաս Ղուկասյանին` նրա արյան և մեզի լաբորատոր քննությունների պատասխանները ստանալուց հետո։

ՀՀ առողջապահության նախարարությունն արդեն իսկ հայտարարել է, որ պատասխանատվություն է կրում ՀՀ յուրաքանչյուր քաղաքացու առողջության համար։ Երկարատև հացադուլի նստած` ՀՀ նախագահի թեկնածու Անդրիաս Ղուկասյանի առողջական վիճակի նկատմամբ մտահոգությունը զուտ մասնագիտական դրդապատճառներ ունի։

Առողջապահության նախարարն ու նրա առաջին տեղակալը Անդրիաս Ղուկասյանին անձամբ են տեղեկացրել, որ երկարատև հացադուլը մարդու առողջությունը վնասող այնպիսի անդառնալի պրոցեսներ կարող է առաջացնել և զարգացնել, որոնց հետագա բուժումը կարող է չափազանց դժվար կամ նույնիսկ անհնարին լինել։

Երեկ երեկոյան նախարարի առաջին տեղակալը, մտահոգված լինելով Անդրիաս Ղուկասյանի` նույն օրն առավոտյան վերցված արյան և մեզի լաբորատոր հետազոտությամբ արձանագրված որոշակի շեղումներով, կրկին հորդորել է համաձայնել իր ընտրությամբ որևէ բուժհաստատությունում կարճ ժամանակահատվածում լաբորատոր-գործիքային անհրաժեշտ հետազոտություններ անցնել։

ՀՀ նախագահի թեկնածուն խոստացել է այսօր` մինչև ժամը 11-ը, հայտնել իր որոշման մասին։