ԱՄՆ-ը ՄԱԿ-ում արգելափակել է Սիրիայի հարցով ՌԴ հայտարարությունը

ԱՄՆ պետդեպարտամենտի պաշտոնական ներկայացուցիչ Վիկտորյա Նուլանդը հայտարարել է, որ ԱՄՆ-ը խստորեն  դատապարտում է Սիրիայի մայրաքաղաք Դամասկոսում երեկ իրականացված ահաբեկչական գործողությունները: Դրանցից մեկի` ՌԴ դեսպանատան մոտակայքում կատարված պայթյունի հետեւանքով զոհվել է 53 մարդ, վիրավորվել` ավելի քան 200-ը:

Միաժամանակ, դա չի խանգարել ՄԱԿ-ում ամերիկացի դիվանագետներին արգելափակել Ռուսաստանի պատրաստած դատապարտող հայտարարությունը. տեղեկացնում է РБК-ն: ՄԱԿ-ում ՌԴ մշտական ներկայացուցչության հայտարարության մեջ նշվում է, որ ԱՄՆ պատվիրակությունը Անվտանգության խորհրդի անհրաժեշտ արձագանքը արգելափակում է արդեն երկրորդ անգամ:

«Անընդունելի ենք համարում ահաբեկիչների գործողություններին արդարացում գտնելու` նման մոտեցումը: Ակնհայտ է, որ ԱՄՆ պատվիրակությունն այդ կերպ խրախուսում է նրանց, ում թիրախն են բազմիցս դարձել նաեւ ամերիկյան շահերը, այդ թվում` ԱՄՆ դիվանագիտական ներկայացուցչությունները»,- ասվում է հայտարարության մեջ: