Հայկական կողմից Ադրբեջանի ուղղությամբ ոչ մի գնդակ չի արձակվել

Այսօր ադրբեջանական լրատվամիջոցներում տեղեկատվություն տարածվեց, թե ԼՂՀ պաշտպանական ուժերի հետ շփման գծում, հայկական զինված ուժերի կողմից արձակված գնդակից զոհվել են Ադրբեջանցի ժամկետային զինծառայող Սյանան Ալիզադեն եւ լեյտենանտ Թուրալ Ասկերովը:

Yerkir.am-ը ՀՀ ՊՆ մամուլի խոսնակ Արծրուն Հովհաննիսյանից փորձեց ճշտել, թե այդ ի՞նչ միջադեպ է տեղի ունեցել սահմանին: Ի պատասխան նա մեզ հայտնեց, որ հայկական զինված ուժերը ոչ մի դեպքում նախահարձակ գործողություններ չեն իրականացրել եւ չեն իրականացնում, եւ ոչ մի անգամ առաջինը չեն խախտել հրադադարի ռեժիմը:

Իսկ ադրբեջանական ԶԼՄ-ների տարածած հաղորդագրությունը չի համապատասխանում իրականությանը: «Թող ադրբեջանցիներն իրենց բանակում ոչ կանոնադրային հարաբերությունների արդյունքում զոհված զինծառայողների մահվան պատճառը չվերագրեն իբր հայկական կողմից արձակված կրակոցներին: Թող նրանք իրենց զոհված զինծառայողների մահվան պատճառները սեփական զորքերում փնտրեն»,- նշեց Արծրուն Հովհաննիսյանը: