Իրաքում 5 սուննի ցուցարար է զոհվել

Բաղդադից 50 կմ արեւմուտք գտնվող Էլ Ֆալուջա քաղաքում սուննի ցուցարարների եւ  կառավարական զորքերի բախումների հետեւանքով զոհվել է 5 ցուցարար, ավելի քան 60 մարդ վիրավորվել է: Իրաքյան ԶԼՄ-ների տեղեկություններով` տուժել են նաեւ կանայք եւ երեխաներ. հայտնում է ИТАР-ТАСС-ը:

Զինվորները նախ օդ են կրակել, ապա ցրել ցուցարարներին, ովքեր ցանկացել են քաղաքի հրապարակներից մեկում ուրբաթօրյա աղոթք անցկացնել: Սակայն, երբ ակցիայի մասնակիցները սկսել են նրանց ուղղությամբ քարեր նետել, այրել են զինվորական մեքենաներից մեկը, զինվորները կրակ են բացել ցուցարարների ուղղությամբ:

Իրաքի քաղաքներում զանգվածային ցույցերը սկսվել են 2012-ի դեկտեմբերից եւ անցկացվում են հիմնականում սուննի բնակչությամբ նահանգներում: Ցուցարարները պահանջում են վերացնել հակաահաբեկչական օրենքի որոշ դրույթներ, որոնք, նրանց կարծիքով, հնարավորություն են տալիս իշխանություններին անօրիանական գործողություններ կատարել, նաեւ պահանջում են ազատ արձակել առանց դատի ու հետաքննության բանտարկվածներին: