Վրաստանում ազատ են արձակվել 2 հայ քաղբանտարկյալներ

Վիրահայոց թևի մամլո դիվանի տարածած հաղորդագրությունից տեղեկանում ենք, որ ազատ են արձակվել  հայազգի քաղբանտարկյալներ Արմեն Գևորգյանը և Ռուբեն Շեկոյանը:

2012 թվականի դեկտեմբերին Վրաստանի խորհրդարանի կողմից ընդունված համաներման մասին օրենքի համաձայն` հունվարի 13-ին 190 հոգու հետ միասին կալանավայրից ազատվել են նաև մեր հայրենակիցները:

Հարազատների և ընկերների ուղեկցությամբ, ովքեր վաղ առավոտից գտնվել են Թբիլիսիի Գլդանի համար 8 կալանավայրի բակում, նախկին կալանավորներն ուղևորվել են Հավլաբարի Սուրբ Էջմիածին եկեղեցի, որտեղ նրանց դիմավորել է Վիրահայոց թեմի առաջնորդ Վազգեն եպիսկոպոս Միրզախանյանը՝ հոգևոր դասի և պաշտոնեության հետ միասին:

Սրբազանը եկեղեցում աղոթել և օրհնել է Արմեն Գևորգյանին և Ռուբեն Շեկոյանին: Թեմակալ առաջնորդն իր խոսքում բարձր է գնահատել նոր իշխանությունների արդար և մարդասիրական դրսևորումները:

Արմեն Գևորգյանը երկար տարիներ եղել է Աջարիայի հայ համայնքի ղեկավարը և 90-ական թվականներին կազմակերպել է Բաթումի «Սուրբ Փրկիչ» եկեղեցու վերանորոգման աշխատանքները, որոնք ավարտին են հասել 1996 թվականին:

Արմեն Գևորգյանը և Ռուբեն Շեկոյանը մեծ հարգանք են վայելում Աջարիայի Ինքնավար Հանրապետությունում ոչ միայն հայերի, այլև Աջարիայում բնակվող ողջ ազգաբնակչության կողմից:

Մոտ ժամանակներս սպասվում է նաև հայազգի գործիչ, քաղբանտարկյալ Վահագն Չախալյանի ազատումը: